Oppdaga to menn i naboen sin garasje

Klokka 02.41 natt til onsdag blei politiet oppringt av ei dame som observerte folk i naboen sin garasje i Skjelåsen i Lysefjorden.

– Då ho opna terrassedøra høyrde ho at dei snakka austeuropeisk. Så lyste ho på dei med mobiltelefonen, og då sprang dei inn i ein varebil og køyrde frå staden, fortel politioverbetjent Anne Lyssand.

Politiet rykte ut og stoppa ein varebil i Drangsvegen. Denne var køyrd av ein austeuropear, men han var åleine i bilen og jobba som bod.

Huseigar skal ha sjekka garasjen, og det ser ved første augekast ikkje ut som om noko er stole.

Også for to dagar sidan blei eit innbrotsforsøk hindra. Det var i eit næringsområde på Søfteland.

– Eg vil oppfordra folk å låsa garasjar og bodar, og å ikkje ha for mykje verdisakar liggande ute.