Osløpet - dette er nytt i år

Bildeserie:

1 av 5

I fjor, for første gong på minst 14 år, var Osløpet tilbake igjen.

Arrangementet blei ein braksuksess med 266 deltakarar fordelt på barneløp (140), stafett (12 lag a 5 løparar) og hovudløpet (66 deltakarar).

– Det var kjekt å sjå ei sånn blanding av born, unge og vaksne, både aktive og mosjonistar, samla seg for å heia på kvarandre og for å delta i ulike løp.

– Vi ligg bra an i år òg, det er dessutan meldt bra løpevêr, seier Svein Hausberg frå Os Turn friidrett.

Til no er det påmeldt 11 stafettlag, 49 til barneløpet og 22 til hovudløpet.

På nesten same tid i fjor (torsdag før løp) var det påmeldt 5 stafettlag, 43 born og 27 til hovudløpet.

– Tittelforsvarar i stafett, Osbadet, har førebels ikkje meldt seg på, men det ser ut som om ein del lærarar som har utfordra kvarandre, for vi har ei rekkje lag frå ulike skular.

I fjor stilte politisk posisjon mot opposisjon. I år er det førebels berre eitt politisk parti som har meldt seg på, MDG skal vera mjuke trafikantar i høg fart.

Distansar og start

Os Turn Friidrett og Os Sentrumsforening held på distansane.

(Klikk på lenkje til kvar distanse for å sjå resultat og bildeserie frå 2017)

• Barneløp (3-12 år), 520 meter i Os sentrum, start kl 12.00, 12.15 og 12.30
• Stafett, 5 x ca 300 meter i og rundt Os sentrum, start kl 13.14
• Osløpet 6,5 km, 145 høgdemeter, start kl 14

Sjå løypekart i bildeserien over.

Alle har start og mål på Torget i Os sentrum.

– I fjor måtte vi på strak arm dela starten på barneløpet i to, då det var så mange som kom. I år har vi på førehand planlagt å dela starten i tre, etter alder, på dei yngste. Så får dei det litt meir romsleg mens dei spring.

– Vi har òg vurdert å laga ei litt lengre løype for dei eldste av ungane, men det får vi eventuelt ta til neste år.

Dette er nytt

Nytt i år er tidtaking også for dei yngste.

– Dei blir ikkje rangert, men alle får tida si, det trur eg mange vil setja pris på. Det er framleis gratis å delta i barneløpet, vi tar kostnaden.

I år er det òg nytt med mellomtid på hovudløpet. Denne blir tatt ved Oseana, altså nesten halvvegs i løypa.

– Vi vil prøva å få til ei vising av tidene på ein skjerm i sentrum. Det blir ein liten skjerm, men folk kan òg følgja med på mobilen, eller heime på PC-en, kven som passerer mellomtida først.

Også stafettlaga får online-tid for første gong, men her er det sistemann på laget som har chip, og altså slutt-tida som blir oppdatert på direkten på nett.

Online påmelding er ope til klokka 10 laurdag formiddag, frå klokka 11 blir det delt ut startnummer til barneløpet, og frå klokka 12 til stafett og hovudløp.