På veg for å hjelpa hund ned frå fjellhylle

Julaftan i 16.15-tida fekk 110-sentralen melding om ein hund som står fast i vanskeleg terreng i Os.

– Hunden står fast i ein fjellskråning. USAR-gruppa frå Fana brannstasjon rykker ut, opplyser 110-sentralen.

Brannsjef Eivind Hovden fortel at hunden er i området Berge/Hatvik.

– Terrenget er skildra som så vanskeleg at spesialgruppa frå Fana blei sendt på direkten. Dei er gode på denne typen oppdrag.

– Hunden er eit stykke frå bilveg, så det hadde ikkje noko for seg at vi først gjekk på synfaring.

Hovden fortel om ei elles roleg jul for brannvesenet så langt.

OPPDATERT:

Klokka 17.23 meldte 110-sentralen at redningsmannskap hadde tatt seg fram til der hunden var, og skulle snart klatra ned.

Klokka 18.30 meldte USAR-gruppa at hunden var i god stand og levert til eigar.