Påkøyrd person og innbrot i Fjellheim
Politiet oppsummerer den siste veka i Os.
Grunna den store leiteaksjonen som starta tysdag har politiet i Os ikkje kome med dei faste, daglege oppdateringane gjennom førre veke.
I dag blir dei siste sju dagane oppsummert.
Den inkluderer to trafikkuhell og eitt innbrot.
– Måndag kveld for ei veke sidan, i 19.30-tida, var det eit mindre uhell på Kuventræ. Ein bil hamna utfor vegen. Ingen personar blei skadd og ingen patrulje rykte ut, opplyser politiførstebetjent Morten Haugland.
Torsdag formiddag 27. juni fekk politiet melding om ein påkøyrd person.
– Det er ikkje meldt om personskade.
Den påkøyrde jobba med asfaltlegging i Os sentrum, ved Landboden eller Giskavollen, då ein bil køyrde forbi sperring på ny asfalt og råka vedkomande.
– Det er ikkje mistanke om uvøren køyring. Farten var låg. Det var fleire vitne til hendinga, ei hending som truleg blir meldt.
I 08-tida måndag morgon fekk politiet melding om innbrot i Fjellheim.
– Det skal ha blitt utført noko skadeverk.
Politiet rykte ut til staden for å sperra av og dokumentera skadene. Brannvesenet kom òg til staden for å lufta ut.
– Sak blir oppretta og innbrotet blir etterforska, opplyser Haugland.
Det har elles vore nokre meldingar om støy.
Desse kom frå Lekven natt til onsdag 26. juni, frå ein uteplass i sentrum natt til laurdag og frå eit nabolag på Halhjem natt til laurdag.
