Marmorløve sakna frå Mobergslia

Den eine ligg på bakken, den andre er sakna.

Kjetil Vasby Bruarøy
Kjetil Vasby Bruarøytorsdag 24. mars 2022 10:08

Villaen på Mobergslia, som frå 1930 til 1993 var kjent som Christian Michelsens barnehjem, er no eigd av Bjørnafjorden kommune og ikkje blant eigedomane som kommunen har ute for sal.

På kvar si side av trappa i front har det lagt to tunge marmorskulpturar og halde vakt. No er den eine vekke.

– Det har hendt frå tid til annan at løvene har blitt skubba i bakken. Tidlegare denne veka blei det oppdaga at den eine er skubba utfor muren, mens den andre er vekke, fortel leiar for teknisk drift i Bjørnafjorden kommune, Dag Søfteland.

Dette har truleg skjedd i helga, 19. eller 20. mars.

Har du sett broren til denne løva? (Foto: Kjetil Vasby Bruarøy)

Kommunen gjekk ut med etterlysing i går.

– Løvene er tunge, dei veg truleg rundt 200 kilo. Om nokon har stole dei, har dei nok både hatt ein tilhengar, nokre sterke folk eller ein kran med seg, trur Dag.

Han har foreløpig ikkje sjekka skråninga nedanfor villaen, om løva er kasta utfor.

Les ògFjellheim utsett for innbrot og hærverk

Etter helga blei det også oppdaga innbrot og hærverk i Fjellheim.

Politiet var onsdag kveld på synfaring for å sikra spor.

Skal rusta opp uteområdet

Det er ikkje lenger folk som bur i villaen, men kommunen bruker delar av arealet som lager, og har tilsyn med den.

Nabo og kunstnar Arne Mæland har fått lov å bruka delar av tomta som beite for alpakka, og yter som takk ein innsats med å halda området ved like.

– Vi har ein fin avtale, og har sjølv plan om å pynta litt utanfor. Det er mange turgåarar i området, og kjekt om det blir sjåande litt finare ut.

Kommunen bruker delar av villaen til lager. Utanfor skal det rustast opp. (Foto: Kjetil Vasby Bruarøy)

Mæland har lang erfaring med både skulpturar generelt og marmor frå Italia, som løvene er laga av, spesielt.

– Han ville hjelpa oss både å bolta dei fast og å restaurera dei. Dessverre skjedde dette før han kom i gang, men vi håper å få begge løvene på plass igjen.

Tips kan rettast til kommunen eller politiet.

Stolne skulpturar har tidlegare kome til rette.

Henrik Askvik med «Havjomfruen og Hippolytus» saman med Arne Mæland si jente som sit i graset framfor Eldresenteret (foto: Andris Hamre)
Les ògHavjomfruen er funnen

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.