Pionérane Årseth - frå barnehage til bustadmarknaden

Bildeserie:

1 av 8

Søndag er det vising på eit bustadprosjekt på til saman 21 bustadar i Ulvenvegen. Prosjektet inneheld ein blant anna ein sjølvbetjent ordning for skreddarsøm av alt frå rominndeling og val av kjøkken og golv til farge på fasaden (!). Kjøp av bustad kan dessutan, om du vil, inkludera abonnement på bil.

Bak prosjektet står ekteparet Rolf Oskar og Synnøve Årseth. Det er ikkje første gong dei gjer nybrotsarbeid i traust bransje.

Selte 7 av 8 barnehagar

Rolf og Synnøve flytta frå Møre og Romsdal til Bergen, og seinare på 90-talet til Os. Rolf har studert økonomi og jus, og har jobba innan både kommunalplanlegging og sal, Synnøve er utdanna førskulelærar.

Dei starta Os’ første familiebarnehage, med kapasitet på 10 born i eit anna hus enn det dei hadde bygd seg på Hjelle. I mai 2005 opna dei sin første barnehage, Kuvågen Barnehage i heimbygda Os - åtte år seinare hadde dei åtte barnehagar i kjeda Kulur.

– Vi såg at det var ei konsolideringsbølge i bransjen, mange mellomstore kjedar hadde ønskje om å bli større, og det var ganske mange oppkjøp. Vi diskuterte vår situasjon, og alder, og då det kom eit bod vi var nøgde med, slo vi til, seier Rolf om salet av kjeda i 2016.

Årseth har selt Kulur-kjeda

Den siste barnehagen er tatt ut av drift. Eigedomen er del av ny planprosess og kan bli utvikla til anna formål.

2 % utan fornuft

Frå bygging av første barnehage i Kuvågen skilte ekteparet Årseth seg ut som noko banebrytande i val av form og innhald.

– Stadig fleire ser ut til å forstå at estetikk betyr noko for folk, både privat næringsverksemd og det offentlege løftar arkitektur fram i førarsetet. Vi sat på ei tomt vi ville halda mest mogleg som den var, og fekk teikna ei banan av eit bygg, kledd i kebony, funksjonelt og med særpreg.

Kulur var tidleg ute både med å bruka arkitekt, med å bygga sanserom og med å bruka ein god slump med pengar på kunstnarisk utsmykking - som ein 200 kilo tung Vidar Mæland-skulptur av ein flodhest i bronse. Du kan sjølvsagt sitja inni flodhesten og styra den med eit ratt frå Askeladden.

Flodhesten står i Ippo barnehage på Gründerløkka i Oslo, i ein ombygd fabrikk rundt ei verna pipe. I den største barnehagen dei har bygd, Olsvika nær Ålesund, er det fleire sanserom og eit eige musikkrom med vibrerande golv. I den nyaste, Steinsvikkroken i Fana, er sanseromma trekanta, firkanta og sirkelforma - og synlege i bygningskroppen, altså frå utsida.

– Har det betalt seg med kostbar arkitektur, bruk av kunstnarar og ei noko oppgradert innreiing, eller ville de klart å fylla barnehagen òg med enklare bygg?

– Vi har ikkje berre vore kreative og rare, det har vore 98 prosent fornuft i alt vi har gjort. Men vi føler at dei 2 prosentane der vi har sleppt oss litt laus, har hatt høg verdi i forhold til kostnad, både fordi det har vore gøyare å planlegga og bygga, og fordi det har hatt verdi og funksjon for ungane og dei tilsette i barnehagane i ettertid.

Leiker seg vidare i eigedomsbransjen

Så kom 2016 og sal av barnehagekjeda. Ekteparet sto igjen med kapital, men ingen jobb.

– Sa det seg sjølv at eigedomsbransjen no sto for tur?

– Gjennom erfaringar frå barnehagebygging er jo interessa for eigedomsbransjen tent. Det gjekk i den retninga, og vi byrja å sjå etter tomter i og nær Os. Vi ønskjer å ha prosjekt i nærleiken, så vi kan halda eit tett auge med heile prosessen.

Dei kjøpte ei tomt på 7,9 mål på Klokkartre i Ulvenvegen, nabotomta eit pågåande prosjekt på Nymark.

– Vi ønskjer framleis å gjera ting på vår måte, å prøva å tenkja litt nytt, laga prosessen litt meir attraktiv og resultatet slik at enkelte faktorar drar opp verdien av å bruka og bu i det vi bygger.

Ny funksjon: Teikn huset ditt sjølv

På Klokkartræ skal dei bygga 16 rekkehus, 4 leilegheiter og 1 einebustad. Første trinn er 10 rekkehus, når 6 av desse er selt startar grunnarbeidet for alle 21 einingane.

I prosessen med å tenkja nytt har tiltakshavar vore inspirert av bilbransjen, ikkje minst Tesla.

– Når du kjøper ny bil kan du, på nettsidene til produsenten, skreddarsy denne ved å velja eksteriør, interiør, sete, felgar, ytelse og utstyr. Prisen oppdaterer seg etterkvart som du tilpassar bilen det du vil ha.

– Vi har brukt ABO på arkitektur og plan, og fått Picapoint, som har vore byrået vårt lenge, til å laga ein bustadkonfigurator, ei heimeside med funksjonar som truleg ikkje har vore brukt i samband med sal av nye bustadar før.

I den sjølvbetjente designløysinga kan du ikkje berre sjå korleis huset ditt ser ut med ulike typar golv og kjøkken, du kan for eksempel endra rominndeling og endra frå 3 til 5 soverom, frå åpen til meir lukka kjøkkenløysing.

– Du kan til og med endra fasaden. ABO har laga ein palett der alle fargane passar kvarandre, og fasaden blir fin anten alle veljer same farge, alle tar kvar sin eller éin skil seg ut.

Abonnement på bil

Mens ekteparet Årseth eig bustaddesigneren sjølv, og kan bruka denne også på seinare prosjekt, har dei kopla på eit nytt gründerselskap for å tilby bustadkjøparane bil på ein ny måte.

– Eg blei tilfeldigvis kjent med nokre av folka bak bergensfirmaet iMove AS. Etter å ha presentert prosjektet vårt for iMove si styringsgruppe valte dei å køyra lanseringa si nettopp hos oss.

iMove tilbyr ei ordninga som har byrja å få fotfeste i enkelte andre land, og er først ute i Noreg med abonnement på bil.

– Dette er eit steg vidare frå leasing og langtidsleige, i det å tilby ein enkel måte å disponera bil på. Her kan du ha ein mellomstor bil i det daglege, og veksle den inn i ein børstraktor om du skal på fjellet nokre dagar.

Både ABO, Picapoint og iMove blir å treffa på tomtevisinga på søndag, der det både er natursti og utkikstårn på tomta.

– DNB er i ferd med å lansera ein oppgradert bustadlånkalkulator, og har denne klart til vårt prosjekt.

– Vi ser fram til visinga søndag, og til vekene som kjem. Ein garasje som sto på tomta har fått seg eit løft, og blir møtestad for interessentar og kjøparar i sals- og byggeperioden, fortel Rolf Årseth.