Prisa kvarandre, og Fjellheim
I fjor fylte Os Rockeklubb 30 år, i natt blei det feira i det som kanskje var den siste store festen før Oseana i juni overtar som kulturhus i Os.
Og stor fest blei det, 225 av 300 billettar blei selt på førehand, dei siste billettane blei truleg selt i døra.
Det var full sal i Fjellheim og mange var på plass allereie før første band, KingCalling, gjekk på scenen klokka 20.30.
Då Torkjell Rød og Audrey Horne, som fekk kveldens varmaste velkomst av publikum, gjekk på scenen i 01.15-tida for å setja siste spiker i trommehinnene, var det framleis tett framfor scenen.
Midtsiden.no kjem tilbake med fleire bilde og meir om festen, på og utanfor scenen. I første omgang fortel vi om rockeprisane som blei delt ut:
Petter Smart-prisen: Andreas og William Lindborg for beste idé, Søfteland Rock N LoL. Brørne Lindborg har med engasjement, teft og humor skapt ein rockefestival av rang, og blitt ein stor og viktig medspelar for Os Rockeklubb.
Internasjonale ambassadør-prisen: Olve «Abbath» Eikemo frå IMMORTAL. Har selt 70.000 eksemplar av siste album, All Shall Fall, har selt over 800.000 album og spelt for over 600.000 publikummarar til saman i si karriere.
Midtsidens Os rock opp og fram-prisen: Kjetil Grønvigh, som med initiativ, timing og kommunikasjonsevner av grovt kaliber gjer ein uvurderleg jobb for alle utøvarar av rock i bygda.
Stå på-prisen: Kjell Engelsen Moberg frå K-JELL, som er «Os Rockeklubb i person», fekk pris for sitt lange og trufaste arbeid, både med musikken og klubben.
Talentprisen: Michael Hansen, trommespelar i Neoplasma, som imponerte Olve så mykje at han var på scenen både under konserten deira, for å banga med bandet, og under prisutdelinga, for å hylla Michael, som med skarp presisjon rysta Fjellheim av hengslene med trommene sine i natt.
Os Rock City-prisen: Furia. Furia adopterte «Rock City»-begrepet og etablerte det i store delar av den norske rockeverda.
Musikkverkets kvardagsrockarpris: Knut Jacobsen. Anten han er heime i rockemuseet sitt eller heng på Musikkverket er Knut alltid uniformert, klar for konsert, eit symbol i kvardagen som minner folk på at Os har eit levande rockemiljø.
Helteprisen: Torjell Rød frå Audrey Horne. Torkjell er eit forbilde for mange unge rockarar frå Os og ein som alltid frontar Os Rock City, til og med under Det store korslaget på TV2.