Helse | 17. des. 2022

Råd (og bøn) frå legevakta

Kor tid skal du ringa - kor tid skal du ikkje?

Os legevakt. (Arkivfoto: Kjetil Vasby Bruarøy)
Kjetil Vasby Bruarøy
Kjetil Vasby Bruarøylørdag 17. des. 2022 10:44

Det er mange ulike virussjukdomar som gir luftveisinfeksjonar i omløp.

Mange kontaktar legevakta om barn med luftvegssjukdom for tida. Samtidig kan legevakta til tider ha redusert kapasitet fordi tilsette sjølve er sjuke eller har sjuke barn.

Derfor går Bjørnafjorden kommune i dag ut med råd til innbyggarane.

– Vi har mange bekymra foreldre på tråden, noko som fører til kø både på telefon og på oppmøte. Ofte er det ikkje nødvendig verken å ringa eller å møta opp, seier Cathrine Aasen, avdelingsleiar Interkommunal legevakt for Bjørnafjorden og Samnanger.

– Ta det med ro heime, ta febernedsetjande og drikk rikeleg med væske. Det aller meste går over av seg sjølv, supplerer Bjørn Petter Johannessen, legevaktsoverlege.

Ring først - ikkje berre møt opp

Einingsleiar for legetenester i Bjørnafjorden Mike Görtz ber dei som treng legevurdering om kontakta fastlegen når det er mogleg.

– Legevakta er for akutte tilfelle. Viss du blir akutt sjuk og må kontakta legevakta, ring først - ikkje berre møt opp.

Dette er legevakta sine råd for riktig bruk av legevakta:

  • Ikkje ring legevakta for ting som ikkje hastar.
  • Forny reseptane på faste medisinar i god tid før jul og nyttår hos fastlegen din.
  • Hald deg heime dersom du føler deg sjuk og har luftvegssymptom, unngå å smitta andre. Drikk godt med væske, bruk febernedsetjande som paracetamol/ibuprofen.
  • Kontakt fastlegen på dagtid viss du treng vurdering av lege. Ring legevakta om du blir sjuk på kveld/natt/helg og det ikkje kan venta til fastlegen si opningstid. Legevakta kan også gi deg råd over telefon.

Har du barn med luftvegssjukdom? Les dette før du ringer legevakta:

  • Gi barnet rikeleg med drikke (senker temperatur, lindrar hoste, kan løyse slim).
  • La barnet vera lett påkledd ved feber. Då kan barnet bli kvitt overflødig varme.
  • Ein dusj saman med foreldre og avkjøling ved å ikkje tørke barnet etterpå, er ein effektiv måte å få ned temperaturen på.
  • Gi nasespray ved tett/ rennande nase (saltvatn, eventuelt slimhinneavsvellande).
  • Hald barnet heime frå barnehage/skule. Ver heime til barnet er i betring.
  • Bruk febernedsetjande medisin som Paracet/Ibux dersom barnet har vondt eller så slapt at det ikkje drikk. Febernedsetjande gjer ikkje barnet fortare friskt.

Ved hoste/luftvegsplagar:  Forsøk å la barnet ligga med heva overkropp om natta. Legg for eksempel klossar eller bøker under sengebeina i hovudenden.

Ved pustebesvær:  Opptre roleg og trøyst barnet.

Ved falsk krupp/ astma: La barnet sova i eit kjølig soverom, ta gjerne barnet ut i kald, frisk luft i minimum 20 minutt ved anfall.

Ved HØG FEBER (> 40 grader): Vekk barnet eit par gongar i løpet av natta. Får du god kontakt med barnet ditt når du vekker det? Ver spesielt omerksam på utslett i form av blodutreidingar, små raudfiolette prikkar som ikkje blir borte når du pressar sida av eit drikkeglas mot huda.

Slikt utslett, eventuelt saman med sløvheit, oppkast og nakkestivheit, kan vere teikn på alvorleg sjukdom. Kontakt lege straks.

Kontakt fastlege, eventuelt legevakt, dersom barnet ditt:

  • Er tre månader eller yngre og har feber
  • Har redusert allmenntilstand, verkar slapp og ikkje orkar å ete/drikke
  • Har feberkramper
  • Dersom barnet strevar med å få luft og/eller pustar raskt
  • Kontakt også lege dersom du er engsteleg for at barnet har ein alvorleg sjukdom

Legevakta er for alle, men ikkje for alt

  • Ring 113 når det står om liv. ​​
  • Kontakt fastlegen din først. Utanom fastlegen si opningstid kan du ringa legevakta viss det er akutt og ikkje kan vente til neste dag.
  • Ring legevakta på 116 117 først og avtal tid. Har du ikkje avtale, må du vente utanfor legevakta.
  • Ikkje ring legevakta om du er frisk!

Legevakta er open heile døgnet.

Om legevaktstasjon Eikelandsosen

Vaktlege tar imot pasientar som ikkje kan vente til fastlege opnar dagen etter/måndag.

Vaktlege tar imot pasientar kl. 18-20 i verkedagar, Laurdag, søndag og heilagdagar kl. 11-15.

Spennande? Vil du ha ukas høgdepunkt i innboksen?

Tilgang til alt innhald for berre 145 kr i månaden

Di støtte gir liv til lokalavisa vår. Vi set stor pris på om du hjelper oss å spreia nyheitene!

  • Tilgang til alt innhald
  • Under 37 kr/veka
  • Utan bindingstid
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.