Rekord for Osøren

Bildeserie:

1 av 3

I fjor feira dei 10 år, i år sette Osøren Blues & Jazzfestival rekord i sal av billettar.

- Vi hadde budsjettert med rundt 1,4 millionar kroner i billettsal. Eg har ikkje endeleg resultat, men eg veit at vi passerte dette med god margin, seier festivalsjefen.

Med sol og temeraturar oppunder 30 varmegradar kom det ekstra mykje gjestar sjøvegen. Os hamn sette truleg også rekord, i tal på gjestar på éi helg.

- Det som i hovudsak hindrar vidare vekst for festivalen er overnattingsplass. Ikkje har vi nok bryggeplass og ikkje har vi campingplass. Eg har vore i dialog med kommunen, og håpar dei finn eit område nær sentrum som eignar seg til å ta imot campingturistar.

Mange høgdepunkt
Den største konserten Osøren nokosinne har hatt, var laurdagen, med 1400 publikummarar på Vamp, Erik Slim Zahl and the Southwest Swingers og Vetrhus Blues Band i Vognhallen.

- Fredag hadde vi drygt halvfullt i Vognhallen, men vi hadde heller ikkje rekna med å selja ut to kveldar på rad på hovudscena.

- Kyrkjekonserten var veldig bra, denne kunne fleire fått med seg. Vi hadde over 200 i Os kyrkje, så det såg fullt ut, men vi hadde plass til fleire, ramsar Gunnar opp.

Også på den nye spelestaden Visningssenteret har arrangørane fått fine tilbakemeldingar. Rundt 150 fekk med seg latinokvelden med Combo Candome og Trio de Janeiro.

Reidar Larsen, som runda av fredagskvelden, var det mange som hadde høge forventningar til. Sist han spelte i Os var nemleg nesten så taket i Fjellheim blei løfta av. I år var det meir tamt.

- Jam-en klokka 13 fungerte heller ikkje heilt slik vi hadde håpa, men Papa Slide Band, som gjekk på scenen klokka 15, fekk verkeleg fart i publikum. Vi visste frå før at han var god, men den fantastiske stemninga han skapte var ei positiv overrasking, seier Gunnar Nagell Dahl.