Sendt heim frå fest
To utanbygdskarar rauk uklar med resten av festen.
Kjetil Osablod Grønvigh
Fredag kveld i 19-tida fekk politiet melding om ei plagsam kvinne på ein av serveringsstadane i Os sentrum.
– Kvinna, som er i 20-åra, var både lettkledd og tydeleg berusa, fortel politioverbetjent Atle Birkeland ved Os lensmannskontor.
– Vi fekk køyrt kvinna til legevakten, kor ho etterkvart vart teken hand om av helsevesenet.
Returnert til Fana
I 01.30-tida natt til laurdag måtte politiet rykka ut til ein privat fest eit godt stykke aust i Os aust.
Her hadde to unge herremenn kome dårleg overeins med resten av festen, og det vart meldt om slåsting, fyll og bråk.
– Dei to unge karane, begge i 18-19 årsalderen var heimehøyrande i Fana. Dei vart etterkvart, med vår hjelp, vist bort frå festen, fortel Birkeland.
For stor hengar
I eitt-tida natt til søndag vart ein bil med hengar stoppa av politiet i Byvegen.
– Bilførar hadde ikkje førarkort for å trekka ein hengar av den storleiken, og det vart skrive ut eit forenkla førelegg på staden, seier Birkeland.
2 x promillekontroll
I tre-tida natt til søndag hadde politiet promillekontroll i krysset Lyseklostervegen/ Sperrevikvegen.
– Her vart totalt 18 bilførarar sjekka, og alle blåste til grønt, fortel Birkeland.
Søndag morgon hadde politiet ein ny promillekontroll, denne gangen på Lepsøy. Her vart seks bilførarar kontrollerte, og heller ikkje her vart det reaksjonar.
Ingen hendingar grunna vêret
Birkeland fortel at politiet sin operasjonssentral har hatt stor pågang grunna vêret som har vore i helga.
– Bortsett frå ein båt som gjekk ned i Hatvik, har vi ingen andre hendingar i loggen for Os, avsluttar Birkeland.