Skuffa over hærverk i Os sentrum
Dette synet møtte Tove då ho kom på jobb i dag.
Då Tove Tvedt Skarstein kom til Os sentrum for å førebu opning av butikken Madam Ane, låg blomar strødd utover Torggata.
– Det var eit veldig skuffande syn, seier Tove.
– Eg forstår at folk kan krangla når dei er på fest, men ikkje at dei går laus på pynt. Eg fattar ikkje kva som sviv rundt i hovudet på folk.
– Også no, når Os sentrum er på sitt finaste.
– Heldigvis ser det ut som om dei aller fleste set pris på denne dekoren, og respekterer den gode innsatsen og det fine resultatet grøntavdelinga i kommunen skapar med små midlar.
Samtidig kunne det vore verre.
– Eg blei jo uroa for om dei hadde gått laus på utstillinga til blomsterbutikken i nabolokalet, men det hadde dei ikkje. Det er heldigvis ikkje så ofte vi er utsette for hærverk, men det er skuffande og overraskande kvar gong.
Tove ville ikkje uroa kommunen på ein laurdag, men tok med seg kost, brett og spann og rydda sjølv.
