Steppin' Out kan endeleg sleppa ut

Slepp fem nye låtar og lover groovy covermusikk - helst utandørs - på Oseana.

Kjetil Vasby Bruarøy
Kjetil Vasby Bruarøytorsdag 17. juni 2021 21:58

«Ticket to Ride» frå albumet «Help!» (1965) var The Beatles sin sjuande nummer 1-song på dei britiske hitlistene. Den har blitt kalla «psykologisk djupare enn nokon anna dei har skrive».

Trudde du «Ticket to Ride» betydde billett til å sitja på (med tog eller berg-og-dal-bane)?

– Det trudde eg òg. Men så sa Olav (musikarkamererat Olav Skorpen) at teksten handlar om «Ticket to Ryde», fortel Steppin' Out-vokalist Jan Haaland.

Vokalistane Jan og Kristine på øving i Midtbøvegen. (Foto: Kjetil Vasby Bruarøy)

Inspirert av denne har han skrive «Bussen til Os», som du kan høyra utdrag av i videoruta over.

– Ei jente som hadde krangla med kjærasten sin, og kjøpte billett til den vesle byen Ryde på Isle of Wight.

Dette er McCartney sin versjon. Lennon har ein grovare, ifølgje Wikipedia. «Ride» var sleng for sex, og «ticket» skal referera til helsekorta dei prostituerte i Hamburg hadde, som bevis på at dei ikkje var smitteberande.

«Bussen til Os» handlar om ein mann frå Bergen som har funne dame på Os. Dei kranglar, ho reiser, men han bekymrar seg lite.

Utsett tre gongar

Steppin' Out består av vokalistane Kristine Bjånes og Jan Haaland, Knut Vidar Garlid på tangentar og Nils Midtseter på trommer.

Strengar låner dei med seg, Tormod Bjånes på bass og Steinar Lyssand på gitar.

Vi møtte dei på øving søndag, heime i nyoppussa stove hos Nils Midtseter.

– Det har vore spelt mykje musikk i dette huset opp gjennom åra. Vi har god trening i å ominnreia, seier Nils.

Husvert og trommespelar Nils Midtseter. (Foto: KVB)

I fjor var Steppin' Out i studio og spelte inn tre nye låtar. I tillegg er det skrive og øvd inn to til.

– Det blir urframføring i Oseana. Vi håper naturlegvis at det blir vêr til å spela ute, seier Jan.

Sleppekonserten skulle vore spelt både på nyåret og i april. No er smittetrykket lågare, så då er det berre å håpa på høgtrykk og sol søndag 27. juni.

Ifølgje Ticketmaster er det få billettar igjen.

Steppin Out håper å spela utandørs på Oseana søndag 27. juni. (Foto: KVB)

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.