Styrkar busstilbodet frå Os

Frå mars neste år vert det dobbelt så mange avgangar på linje 600 i rushtid.

Trafikken på den nye linje 600 er høgare enn prognosane Skyss hadde på førehand.

Les ògNye linjer og ekstrabussar - er det ein reell auke?

– Det er veldig gledeleg at så mange vil reisa kollektivt, seier Skyss-direktør Målfrid Vik Sønstabø.

– Samstundes har det gjort at nokre avgangar ofte vert fulle. Me vil difor dobla frekvensen ein time i rushtida, både om morgonen og om ettermiddagen.

Auken trer i kraft 6. mars neste år.

– Me skulle gjerne ha innført ho endå tidlegare, men treng rett og slett litt tid på å få på plass ein god logistikk, med tanke på både bussar og sjåførar, seier Skyss-direktøren.

600-bussen går frå Osøyro til Lagunen langs nye E39, og deretter vidare til Bergen busstasjon.

Når den no skal gå kvart 7,5 minutt i rushtid inneber det ei styrking av tilbodet også for passasjerar i Bergen.

– Eit godt kollektivtilbod er viktig for å redusera personbiltrafikken i byen. Me håper denne endringa kan bidra til at det vert enklare for endå fleire å velja å reisa kollektivt, seier Sønstabø.

Direkterute frå Gjermundshamn

I samband med omleggingane ved opninga av den nye vegen til Os vart det også gjort endringar på linje 740.

Linja fekk fleire avgangar på strekninga Eikelandsosen-Osøyro, med byte til linje 600 på Osøyro terminal.

Sjølv om dette har gitt fleire reisemoglegheitar har det medført nokre utfordringar for reisande til og frå Gjermundshamn og Kvinnherad.

For å bøta på dette vert det frå 6. mars lagt til ein avgang frå Gjermundshamn klokka 1050 og direkte til både Haukeland sjukehus og Bergen busstasjon.

Det vil også vera ein direkteavgang frå Bergen til Gjermundshamn om ettermiddagen, utan overgang på Osøyro.