Svingte av rullebanen under oppbremsing

Klokka 14.20 i dag blei politiet varsla om uhell på Vaksinen flyplass.

– Eit fly har sklidd ut etter landing. Det er ingen personskade, skriv Vest politidistrikt på Twitter.

Operativ leiar i Os Aero Klubb, Tore Øvreeide, var på flyplassen kort tid før uhellet skjedde, og returnerte då meldinga kom.

– Han skal ha landa som normalt, men eitt eller anna har skjedd under oppbremsing som gjorde at flyet svingte ut til sida.

– Piloten er ein vaksen og erfaren mann. Kva som skjedde er foreløpig uvisst. Han er heldigvis uskadd.

Også flyet er utan synlege skadar.

Bildeserie:

1 av 3

– Men flyet står på ei myr. No gjeld det å få det tilbake igjen på flystripa utan å gjera skade på det.

Det er slepeflyet LN-KCM som er involvert, ein Piper Cub «Supercub» bygd i 1959, kjøpt inn til klubben i 1983.

Flyet har plass til to, men det var berre piloten om bord då uhellet skjedde.

– Politiet har vore her. Dei har sagt at dei ikkje opprettar sak. Det gjer heller ikkje Flyhavarikommisjonen.

– Men vi skriv no ein rapport til Luftfartstilsynet, som regisrerer dette som «ei hending», seier Øvreeide.