Tar touren til Os igjen

Tour of Norway for Kids, som blei starta av Norges Cykleforbund i 2005, besøkte Os både i 2009 og 2011.

– Vi fekk spørsmål om vi ville ha arrangementet tilbake i Os og takka ja. Det var jo kjempebra begge dei to andre gongane, seier nestleiar i sykkelklubben i Os, CK Henie, Torbjørn Magnussen.

– Os Sentrumsforening hjelper til og har organisert med sperring av biltrafikk desse timane.

Sist gong samla arrangementet over 200 unge syklistar til eit kort ritt midt i sentrum.

– Vi hjelper til med å rigga opp banen og med litt mannskap under sjølve løpet, men arrangørane har med seg resten av sirkuset og styrer heile opplegget. Kanskje kjem TV2 også.

Frå trehjulsykkel til 14-åringar

Det populære sykkelrittet går gjennom ei kort løype inne i Os sentrum og har deltakarar frå barnehagealder og opp til og med 14 år.

Deltakarane blir delt i puljer etter alder. Også dei med trehjulsykkel og støttehjul kan stilla.

Det er gratis å delta og alle som er med får t-skjorte, diplom og premie. Deltakarane er også med i trekninga av ein Merida-sykkel.

Rittet startar klokka 14 torsdag 18. juli.