Tung jobb i våt snø

Kvar vinter sidan 2010 har Siv Vevle og sambuaren Alf Holdhus frå Os brukt delar av påskeferien på å bygga i snø utanfor hytta på Kvamskogen.

Frå 2017 har Midtsiden vore heldig og fått tilsendt ferdigattesten.

– Det byrja med at vi gjekk tur forbi ei hytte der andre hadde laga ein kylling eller høne i snø, og fargelagt denne. Då fekk vi òg lyst å prøva, fortalde Siv til Midtsiden i 2017.

Sidan har det blitt ein tradisjon. Ut frå snømengde - og konsistensen på snøen, har høgda på høna variert frå 2 til 4 meter.

I 2022 fekk den kyllingfarga høna hatt selskap av ein hare. Sånn blei det i år òg.

– Det såg spøke ut i år. Vi starta palmelaurdag. Då vi var halvvegs hadde sludd blitt til regn, og vi tok pause.

– Planen var faktisk å byrja i januar, men då kom ein flaum og tok stien opp til hytta, så vi blei opptatt med andre ting, fortel Vevle.

I går blei både høne og hare ferdigstilte.

– Det var tung og våt snø. Å bruka snøfres var lite hjelp i, så det måtte byggast for hand.

Høna blei cirka 4 meter lang og mellom 2 og 2,5 meter høg.

– No kan alle barn og barnebarn koma og feira påske med oss. Hytta er nyleg utvida, og vi blir 14 i år, i tillegg til to hundar, fortel Vevle.