Tysnesfest slepp fire namn

Årets Tysnesfest hadde svake besøkstal i svært dårleg vêr, men førebuingane til neste sommar går for fullt.

Tysnesfest 2023 går av stabelen 12. til 16. juli. Frå før er Astrid S booka, i natt sleppte festivalen yttarlegare fire namn.

– Me følgjer opp med ein variert og strålande bukett med artistar som kjem til å sørge for fantastisk stemning på Tysnes til sommaren, seier festivalsjef Øystein Vaage i ei pressemelding.

Odd Nordstoga, Julie Bergan, Ka2, Den BB saman med Kevin Lauren er klare for Tysnesfest 2023.

Nordstoga skal også spela på Tysnessåto.

– Såto-konserten har blitt ein kjær tradisjon på Tysnesfest. Til neste år er byggjetrinn 1 i Sherpa-stien opp til Såto ferdigstilt, og det vil kunna trekka endå fleire opp dei 753 høgdemeterane til toppen, seier Vaage.

Han gler seg også til å høyra fleire av dei noko ferskare artistane.

Bildeserie:

1 av 3

– Ka2 sine ekstravagante, fargerike shows med psykedeliske element har gjort bergensduoen til det-du-må-sjå når det gjeld kule konsertar.

– Den BB ein av Noreg sin største norskspråklige artistar med over 200 millionar strøymingar. Dei «rullær» rundt med eit spektakulært show saman med det nye rap-fenomenet Kevin Lauren. Dei vil garantert vil setja fyr i Tysnesfest-publikummet når dei avsluttar festivalen.