Ungdomslag har filma julekrim

«Portveien Blod» har premiere søndag.

Kjetil Vasby Bruarøy
Kjetil Vasby Bruarøytorsdag 25. nov. 2021 14:48

Ungdomslaget Vårvon i Øyane har laga julekrim til årets ventetid fram mot jul.

Over fire episodar, éin kvar adventdssøndag, skal dei underhalda deg med ein heimelaga julekrim.

– Grunna pandemien så blei det jo ikkje revy i år, så eg tenkte me kunne visa lokalsamfunnet at dei likevel ikkje er kvitt oss, seier Asbjørn Austevoll.

Asbjørn Austevoll, her på scenen under Øyarevyen i 2019. (Foto: Kjetil Vasby Bruarøy)

Han er vanlegvis tekstforfattar og ein av skodespelarane i Øyarevyen. Sidan forsommaren har han gått med ein filmidé i magen.

– Eg lufta det for nokre i revygruppa i sommar, og så samla me alle for tre månadar sidan. Det er ein engasjert gjeng, og alle blei gira.

Traileren ser du i ruta over.

Ei hending på Kobbavågen

Asbjørn hadde i utgangspunktet krimserien ferdig skissa i hovudet, men nye idear kom til gjennom sommaren og, ikkje minst, i møte med resten av revygruppa.

– Utgangspunktet er ei kriminell handling. Me kunne lagt handlinga ulike stadar i Øyane, men etter alt styret med desse portane i sommar, så skreiv jo Kobbavågen seg opp på lista.

Marius og Hugo er eminente som etterforskarar. (Foto: Ungdomslaget Vårvon)

Dermed blei også tittelen «Portveien Blod», ikkje ulik barne-TV-serien Portveien 2, som mange av dei som i dag er i 30- og 40-åra hugsar.

Til inntekt for ungdomslaget

Handlinga er naturlegvis på heimebane i Øyane, men også skodespelarane og produsentane er kortreiste.

Folk i revygruppa hjelper til på kvar sine måtar, med idear, skodespel, foto og klipping.

På skjermen får vi sjå Marius Vedholm Aasen, Hugo Hansen, Asbjørn Austevoll, Christer Røttingen og June Strønen.

Kristian Bruarøy har klipping og mesteparten av filminga.

– Målet er å skapa inntekt til ungdomslaget, seier Kristian.

Det har jo vore få arrangement i ungdomshuset Skogheim under pandemien.

– Me skal selja episode for episode. Det tekniske er ikkje heilt spikra, men det ligg an til at me køyrer det via Vimeo.

Dei interesserte bør følgja med på Facebook-sida «Aktivt i Øyane».

– Som vanleg får du størst utbyte av det ungdomslaget kjem med viss du bur her, eller følgjer med på livet i denne krinsen. Men den kan nok vera kjekk å sjå også for folk innøve land.

Ungdomslaget har også planen klar for revy. Om ikkje det blir restriksjonar går den som vanleg av stabelen i februar (2022).

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.