Bildeserie:
To år har gått sidan sist, men så vann Statsraad Lehmkuhl tilbake vandrepokalen, The Boston Teapot Trophy.
– Dette er klassen for dei største seglskipa i verda, 120 skip frå heile verda. Vi vann pokalen første gong i 2008, no har vi vunne 5 av dei siste 7 åra, seier osingen og Statsraad-direktøren Anders Lekven.
– Ekstra kjekt var det å setja ny verdsrekord, dette er det raskaste nokon har segla i Boston Teapot si historie.
Eldst og raskast
Statsraad Lehmkuhl er 100 år i år. The Boston Teapot Trophy er 50 år.
– Det yngste skipet som deltok i år er berre 7 år gamalt. Statsraaden er det eldste skipet.
Fredag var det feiring, utan båt, i Statsraaden sine lokale. Laurdag starta mannskapet seglturen heim over Atlanteren etter å ha fått nye segl (les om orkanen på BA.no).
Lekven skryter av mannskapet.
– No var Statsraaden ei vaksen dame, 94 år, før ho byrja å vinna. Men vi kan nok i hovudsak takka sjøfolka vi har om bord, både det faste mannskapet og dei tøffaste kadettane frå Sjøkrigsskulen, for at vi no har stabilisert oss heilt i verdstoppen.
– Aldri kjedeleg med Drevland og Søviknes
Lekven fortel om ein staseleg markering og feiring av verdsrekorden fredag.
– Det blir aldri kjedeleg saman med Trude Drevland og Terje Søviknes, spesielt ikkje om du gir dei ein sabel, seier Anders og ler.
Dei to ordførarane, som begge stilte med ordførarkjede (på Drevland sitt initiativ), kutta kaka med sabelen.
– Trude og Terje er begge utnemt som ambassadørar, dei to einaste Statsraad Lehmkuhl-ambassadørane vi har.
– Men det var fleire ordførarar på festen, og dette understrekar det samhaldet vi har i regionen.
Statsraad Lehmkuhl besøkte Os i år og kjem tilbake fleire gongar neste år.