Båtbyggarane på Oselvarverkstaden har i fleire år stått ute under telt og dukar for å smøra båtane. No får dei snart betre arbeidsforhold.
– Vi tok ned eit gammalt naust for ein del år tilbake, Askvik-naustet, og lagra det. Det var eit grindbygg, men med kledning.
– Dette byggverket har lagt på lager litt for lenge dessverre, for då vi til slutt søkte om å setja opp att bygget, såg vi at det var ròtna, så vi måtte bygga nytt, fortel dagleg leiar Vidar Langeland.
– Då vi var i skogen i fjor og samla inn emne til båtbygginga, så tok vi vare på stokkar som kunne eigna seg til dette bygget.
I haust fekk dei løyve, no har bygget reist seg.
Godkjent i fire år
Grindbygget har blitt godkjent med plassering ved Oselvarverkstaden, men godkjenninga varar kun i fire år.
– Det tok oss vel eit år å få godkjent denne søknaden, med løyve til å ha bygget ståande i fire år. Før tida går ut må vi søka om ny periode.
Men det er ikkje heilt spikra at verkstaden vil søkja om fire nye år.
– Det blir morosamt å sjå korleis bygget vil fungera i kvardagen. Vi vil sjå om det blir godt brukt og om det visuelt sett vil passa inn på staden. Då vil vi vurdera å la det stå vidare, eller om vi skal plukka det ned og setja det opp ein annan plass, seier Langeland.
![Grindbygget nærmar seg (Foto: ØH).](/_next/image?url=https%3A%2F%2Fcdn.sanity.io%2Fimages%2Fahcmq7tx%2Fproduction%2F04d34008e6d97860a1cfc1d6e6b012e258882d5d-1140x760.jpg%3Frect%3D0%2C38%2C1140%2C684%26w%3D752%26h%3D451%26q%3D100%26dpr%3D2&w=3840&q=75)
Arbeidsplass og utstillingsvindu
Det er lite som gjenstår før bygget er ferdigstilt.
– Det vil vera klart om ein liten månad, no manglar det berre tak, seier Langeland.
– Ein slik arbeidsplass vil vera ekstra synleg for folk i Os, både innbyggarar og gjestar, som no kan koma og sjå båtbyggarane i aksjon.
– Det vil fungera som eit flott utstillingsvindauge for verkstaden. I tillegg kan båtane lett takast ut av grindbygget, om det er eit arrangement på staden.