– Vi har lært mykje

Det nærmar seg konfirmasjon og konfirmantundervisninga er i hamn. Ungdomane har hatt mange aktivitetar å velja mellom som del av konfirmasjonsundervisninga, frå båtliv, foto og musikk til friluftsliv, generell idrett og golf.

– Vi har litt over 180 konfirmantar i Os kyrkjelyd i år. Dei eg har hatt med meg på golf har vore cirka annakvar veke på banen, fortel kyrkjelydspedagog Arne Stautland før han serverer Midtsiden eit bibelvers:

"La ingen forakte deg fordi du er ung, men vær et forbilde for de troende i ord og livsførsel, i kjærlighet, tro og renhet." (1. Tim. 4,12)

– Sjølv om ungdomane har hatt tilbod om ulike aktivitetar har den tradisjonelle konfirmasjonsundervisninga vore med, anten i kyrkjelydshuset eigne ettermiddagar, eller her oppe i klubbhuset til Bjørnefjorden Golfklubb.

– Vi lærer blant anna at Gud er med oss over alt, også på golfbanen, og mykje av det vi lærer som kristen passar ekstra godt inn på ein golfbane, som dette med etikette, seier Stautland.

– Ei flink gruppe

18 av årets konfirmantar har hatt golf som del av undervisninga. På Bjørnefjorden Golfklubb har ungdomane fått prøva både simulator og bane og dei har blitt tatt godt hand om av instruktørane Arvid Moberg og tidlegare dagleg leiar gjennom mange år, Erik Just Olsen.

– Dei har vore veldig interesserte og flinke, og dei aller fleste har tatt grøntkort, fortel Eivind Hodneland, som nyleg overtok som dagleg leiar i klubben.

Måndag var det avslutning og då blei foreldra invitert til å vera med på banen.

– I tillegg informerte junioransvarleg Sverre Marcelius om ungdomssatsinga til klubben, seier Hodneland.

Blei plutseleg god

Ei av konfirmantane som har deltatt på golfundervisninga i vinter er Hilde Eirin Lohne.

– Eg hadde foto som førsteval og golf som andreval. Det var heilt greit at det blei golf, for dette var gøy! synes ho.

I starten var det litt vanskeleg, men då ho fekk ting forklart var det lett å overføra teori til praksis.

– Eg har merka at eg har blitt betre, men har aldri sett på meg sjølv som god, ikkje før på måndag, då foreldra våre var med, ler ho.

No reknar Hilde med at det blir fleire turar oppom banen utover sommaren. Men først ventar den store konfirmasjonsdagen.

Konfirmantane som har hatt foto lagde utstilling før jul:

Les òg: Konfirmantane har knipsa

Her finn du oversikt over konfirmantane i Os 2012.