Viktig for fleire

Det er ikkje berre ordførar Terje Søviknes (Frp) som jublar over at regjeringa no har levert bompengeproposisjonen til Stortinget. Også for leiar-kollegaene i Bergen og på Tysnes er det ein jubledag.

– Eg er veldig nøgd i dag.

– Dette er eit viktig samband også for oss som bur i Sunnhordland.

– Det vil korta ned reisetida frå Tysnes til Bergen med ein-tredjedel og gjera området til ein enno større arbeidsmarknadsregion.

– I dag er det fest i Sunnhordland òg, ikkje berre på Os, smilte ordførar Kjetil Hestad.

Knyt kommunane tettare saman

Han får støtte frå byrådsleiar i Bergen Ragnhild Stolt-Nielsen (H).

– Dette må jo vera den best planlagte vegstrekninga i heile Noreg.

– Det at reisetida no halverast mellom Os og Bergen betyr mykje for bergensregionen som eit attraktivt bu og arbeidsmarked.

– Vi kjempar med andre stader om dei kloke hovudene, påpeiker Stolt-Nielsen.

Ventar på gravemaskina

Stolt-Nielsen fortel at dei fatta det siste naudsynte vedtaket i 2012.

– Alt er klart frå Bergen si side.

– No ventar vi berre på at gravemaskinene byrjar å gjera jobben sin, smiler byrådsleiaren.

Ein ny kvardag

Dagleg leiar i bompengeselskapet Torbjørn Wilhelmsen er blant dei som skal vera med på å skaffe til vegs midlane til vegen.

– Vi er klare til å ta fatt på den jobben, berre vår rolle blir avklart i høve dei statlege bompengeselskapa.

– Men dagen i dag er først og framst ein gledens dag for dei som bur langs den eksisterande E-39.

– I 2021 vil dei få ein heilt ny kvardag uten tungtrafikken som dundrar forbi som i dag. For dei må det jo opplevast meir eller mindre som ein revolusjon.