Vil vidareutvikla potensialet i Oselvarnaustet
Bak det nystarta firmaet OsNaustet utleige AS finn vi tre kjende fjes.
Bildeserie:
Etter ni år og om lag 450 utleige-oppdrag har Bjørg Bergstø no takka av som ansvarleg for utleigedrifta til Oselvarnaustet.
No skal OsNaustet utleige AS syta for drifta - og vidareutvikla dei populære lokala i Hamnevegen.
– Geir er skuld i dette!
Dette seier Trude Thunold, ein av tre partnarar i det nystarta firmaet. Saman med kollega frå MK Catering AS, Mariann Brandseth, og Cold Cat- og altmogeleg-mann Geir Jonassen, er ho i desse dagar klar for å drifta vidare ein institusjon i selskapslivet i Os.
Jonassen fortel at ideen ikkje er ny, men då Bjørg Bergstø melde at ho ville takka av, vart den på ny aktuell.
– Eg er sjølv med i Oselvarlaget, og meg og Trude og Mariann har samarbeidd tidlegare, så no var tida inne for å realisera denne ideen. Vi driv alle med mat, og vi har etterkvart eit godt nettverk mellom oss, så dette har vi heilt klart trua på.
Potensiale i vekedagane
Brandseth, Thunold og Jonassen fortel, til tider i munnen på kvarandre, om potensialet dei ser i Oselvarnaustet;
– Det er heilt klart ein marknad for dette i Os, seier Brandseth, utover eit snitt på éin leigetakar i veka. Vi vil tilby lokalet i vekedagane òg - det vera seg møtelokale for lag og organisasjonar eller samkome i samband med til dømes gravferder. Lokalet har god kapasitet, er sentrumsnært, men i rolege og idylliske omgjevnadar.
Thunold fortel at eit auka tilbod om tilpassa levering av mat i samband med leige av lokala er eitt av fleire tilbod som vil koma på plass.
– Du kan sjølvsagt få leiga lokala og ta med eigen mat, men for mange er det kjekt å kunne sleppa å tenkja for mykje på dette. Der vil vi kunne skreddarsy løysingar for kvar enkelt. Ønskjer du å feira bryllaupet ditt her, vil det sjølvsagt vera mogleg å leiga lokalet nokre dagar på førehand òg.
Ein møtestad
– Har de planar for å gjera noko med sjølve lokala, er vil de behalda dei som dei er?
– Det viktigaste er at Oselvarnaustet skal vera ein møtestad for alle, seier Jonassen. Lokala er for flotte til å stå tomme. Vi har ingen konkrete planar om store endringar, men vi vil sjølvsagt sjå på korleis lokala fungerer, og kva vi kan gjera for å gjera opplevinga endå betre.
– Først av alt skal vi gjera alle merksame på at Oselvarnaustet er meir enn berre kjekke lag i helgene - her skal det vera folk heile veka.
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.