Viste kven som er best

– Det kan bikka begge vegar, sa Sverre Lunde Pedersen til Midtsiden på spørsmål om kor lenge toppformen ville vara etter OL.

I VM allround vann han både 1500- og 5000-meteren før han, 9 minutt ut i den avgjerande 10.000-meteren som han leia med god margin, ramla, reiste seg, slo Sven Kramer og segla skuffa inn over mållinja til VM-sølv.

I etterkant har han blitt hylla av fleire sportskommentatorar for måten han reiste seg på og fullførte etter fallet.

Denne helga stiller han med rak rygg og krumma nakke i Minsk for å avslutta verdscupen med stil. Sverre har frå før 4 individuelle medaljar og 2 på lagtempo før siste verdscup.

Siger i lagtempo og på 5000 meter

– Mange legg seg ned og synest synd på seg sjølv etter ei slik oppleving, men Sverre er innstilt på å sjå framover, sa landslagssjef Sondre Skarli før start.

Laurdag formiddag vann Noreg lagtempo framfor Italia og Japan. Laurdag kveld gjekk han i siste par mot canadiske Ted-Jan Bloemen, mannen som «poserte» med Sverre på målfoto på 5000 meter i OL.

I Korea var Bloemen usle to tusendelar framfor Sverre, i går var Sverre klart best.

Lunde Pedersen gjekk i mål til 1. plass på 6.22,15 og samanlagt-sølv.

Russiske Alexander Rumyantsev hamna på 2. plass med 6.23,81 og nederlandske Marcel Bosker tok 3.plassen med 6.24,12.

Bloemen landa på 5. plass, men vann samanlagt for sesongen (langdistansecupen) framfor Sverre Lunde Pedersen og Sven Kramer.

I dag går Sverre 1500 meter i siste par mot Denis Yuskov.