Alexander Bergo blir sjef for Innovasjon Norge sitt kontor i Silicon Valley

Alexander Bergo (47) frå Os overtar etter Kristian Bye som sjef for Innovasjon Norge sitt kontor i Silicon Valley.

– Det er ein miks av idealisme og interesse i dette. Eg har alltid likt å vera mentor for studentar og selskap, seier Bergo til Shifter.no fredag.

Bergo flytta til Hawaii etter fullført mastergrad i Amsterdam.

Der har han tatt yttarlegare to mastergradar og fullført doktorgrad i 2013.

Les ògDoktorgrad til Alexander Bergo

Framtidsforskaren frå Os har flytta frå øystaten til California, og har frå før base i Palo Alto, som ligg mellom San Francisco og San Jose (i Silicon Valley).

Han kjem frå stillinga som Chief Innovation Officer for MeetingSift, eit firma han starta saman med kona Viil Lid i 2013.

Alexander startar i den nye jobben over sommaren.

• Les Shifter sitt intervju med den nye Innovasjon Norge-sjefen.

Kjerneverksemda til Innovasjon Norge i Silicon Valley er å førebu og gjennomføra gründerprogram som TINC, Reach og Entreprenørskolen - og å vera rådgjevar for norske startups i USA.

Les òg10 år på Hawaii

Då vi intervjua han i romjula 2010 fortalte han om livet på Hawaii, om surfing, jobb, kva han likte med Hawaii og kva han sakna med Noreg.

Han fortalte også om ein ny favoritthobby - stand up paddle boarding.

– SUP er noko eg ikkje kan anbefala nok. Om ikkje så lenge så ser de nok folk stå og padla på lange brett i Bjørnefjorden òg, sa framtidsforskaren Alexander Bergo i 2010.

I fjor byrja SUP å bli eit vanleg syn i skjergarden i Os, i år ser det ut til å ha «tatt av».

Grunna tidsforskjell har Midtsiden ikkje prøvd å nå Alexander laurdag morgon. Vi kjem tilbake med meir når vi har fått ein prat med den nye Innovasjon Norge-sjefen.