Årets første laks i Oselvo: – Alle kan visst bli betre enn læremeisteren sin, ler Alen

Kameraten hadde vore i elva i nesten eit døgn då Alen Nikolic kasta uti spinneren.

Alen Nikolic tok årets første laks i Oselvo. No vil han flytta frå Fyllingsdalen til Os, men ikkje berre for å fiska. (Privat foto)
Kjetil Vasby Bruarøy
Kjetil Vasby Bruarøytirsdag 16. juni 2020 23:08

Ingen fekk fisk opningsnatta i den tørre og låge Oselvo, men første laks blei tatt første døgn.

Alen Nikolic tok ein laks på 5,9 kilo (86 cm lang) på spinner i Kremretten klokka 19.30 måndag kveld.

– Eg har fiska i Oselvo nokre år no, men dette er min største fangst. Det var òg veldig kjekt å ta den første!

– I fjor fekk vi berre kort i nedste sone, og der var det lite å henta. Før årets sesong fekk eg, utan forvarsel, årskort i Kremretten i gåve av kameraten min, fortel Alen.

Nikola Stefanovic var i elva opningsnatta, gjennom natta og heile dagen. Så kom Alen på ettermiddagen og drog storfangsten i land.

– Han hadde gjort seg godt kjent med elva i mellomtida, så eg spøkte med at eleven hadde blitt betre enn læremeisteren, seier Alen og ler.

Det var ungar og bada på same stad i elva mens fisken beit på.

– Kastet som laksesn beit på var berre 15-20 meter frå dei som bada. Eg var litt overraska over at han beit akkurat der, kanskje han frå før var irritert, undrast Alen.

Nikola fekk ikkje laks, men han fekk halda Alen sin. (Privat foto)

Fekk to gjedder på kroken

Kameraten fekk to sjøaure, som han sette ut igjen (det var slutt på fiske etter sjøaure i Oselvo for nokre år sidan, og bestanden tar seg opp).

– Eg fekk og to gjedder. Eg hadde ikkje venta å få gjedde så langt nede i elva. Den eine fekk eg på land, den andre mista eg dessverre.

– Eg skulle gjerne ha registrert desse òg. Eg får sjå på det i morgon.

Hekta på fiske

Alen kom frå Serbia til Noreg for 4,5 år sidan, er bakar og jobbar på restauranten Lysverket i Bergen. Nikola jobbar i byggebransjen.

– Eg rakk ikkje fiska så mykje i Serbia, der eg var i Forsvaret i ni år. Men far min fiska mykje, og eg og kameraten min har blitt heilt hekta på fiske etter at vi kom til Noreg.

Alen sin laks på 5,9 kilo er personleg bestenotering i Oselvo. (Privat foto)

Dei fiskar både i elv og sjø, helst etter laks eller sjøaure.

– Vi har reist til blant anna Matre, Hardanger og Os. Vi bur i Fyllingsdalen no, men ønskjer å kjøpa hus på Os. Ikkje berre for fisket sin del, både eg og familien liker oss der.

I mellomtida skal årskortet brukast flittig.

– Eg fiskar for sporten sin del, og det er med blanda kjensler eg tar ein sånn fin laks på land. Det er eit utruleg kick å få fisk, men det er ikkje om å gjera å få mest mogleg. Tilsvarande haldningar, med respekt for bestanden, opplever eg at dei fleste fiskarar har.

Det er til no, ifølgje prohd.no, ikkje tatt fleire laks. Det er med andre ord ope kven som tar årets «Oskar» (første fisk tatt av medlem i Os jakt og fiskelag).

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.