Brann i båt i Øyane
Utrykking til Toreidpollen måndag ettermiddag.
Klokka 15 måndag opplyste Vest politidistrikt om brann i ein båt i Øyane.
Båten ligg fortøydd nær flytebrua over til Brattholmen, i Toreidpollen, og skal vera rundt 30 fot lang.
Bildeserie:
Meldinga kom inn klokka 14.52. Vitne fortel til Midtsiden at politiet var raskt på staden, og skubba vekk nokre av dei nærmaste båtane for å hindra spreiing.
– Då eg svingte inn mot Inka var det ein god del røyk, og nokre opne flammar ut av båten, seier varabrannsjef Erik Walden.
Han kom åleine i kommandobilen, rett etter politiet, litt før resten av mannskapen.
Saman med politiet fekk han kappa nokre tau og fjerna dei nærmaste båtane.
– Vi fekk god hjelp av nokre sivile som kom i båt, som taua desse båtane vekk.
Også sløkkinga gjekk ganske raskt. Mannskapen er stort sett dei same som fredag var i Vargavågen, der tre båtar blei totalskadde i brann.
– Det såg ikkje ut som om fleire enn denne eine båten blei skadd i dag.
Politiet rekvirerte MS Samba frå Samba Marin som henta havaristen.
– Den tok inn vatn, så vi pumpa båten inntil Samba var i posisjon, fortel Walden.
Ingen er rapportert skadd etter brannen. Det er foreløpig ikkje sagt noko om årsaka.
