Kultur | 16. des. 2012

Debutant til topps på Urørt

Aurora Aksnes frå Os har nyleg spelt inn si første låt. To døgn etter opplasting på NRK Urørt toppa ho lista.

Aurora Aksnes (16) har skrive over 30 låtar. Onsdag 12. desember lasta ho opp <em>Puppet</em>, som raskt klatra opp som Ukens Urørt. (Privat foto)
Kjetil Vasby Bruarøy
Kjetil Vasby Bruarøysøndag 16. des. 2012 07:53

Onsdag 12. desember lasta Aurora Aksnes (16) opp ei nyinnspelt, sjølvskriven og sjølvkomponert låt på facebook, den første låta ho har spelt inn.

Venninna tok lydfila og lasta ho opp på NRK Urørt, og før helga var låta "Puppet" på topp som Ukens Urørt.

– Eg hadde aldri turt å lasta opp låta sjølv, ler Aurora, overraska og glad over responsen.

Det er i skrivande stund allereie 2.991 som har lytta til låta.

Mest dans - til no

Aurora har vore elev ved Os kulturskule dei siste 2-3 åra, men det har vore innan dans, ikkje song.

– Men eg har vore glad i å synga så lenge eg kan hugsa, og har skrive låtar i fleire år no, fortel det unge songtalentet.

Publikum har ho likevel, til no, hatt få av. Det einaste ho har gjort på ein scene før er å dansa med andre av Patricia Langeland sine elevar, blant anna på UKM.

I 2011 var ho del av elitegruppa som gjekk vidare til landsfinalen i UKM i Trondheim.

Les òg: Ghost til Tronheim

Lærar tipsa om TomTom

Aksnes er elev ved Nordahl Grieg, der ho vil gå musikk når ho byrjar i 2. klasse.

Det var ein lærar ved Søfteland ungdomsskule som oppfordra ho til å gå i studio, og som tipsa om osingen Thomas "TomTom" Haugland, som blant anna produserer for kjærasten, Myrna Braza.

– Eg har nettopp vore i studio og det var spennande. TomTom var veldig hjelpsam, synes Aurora.

– Det var kjempegøy å jobba med Aurora, det kjem nok endå meir frå den jenta der, seier Haugland.

– Ho er ung, men veit korleis ho vil ha det. Samtidig var ho flink til å lytta og open for innspel, skryter TomTom.

Har over 30 eigne låtar

Aurora, som sjølv speler piano på "Puppet", fortel at ho skriv alle låtane sjølv.

– No er eg oppe i 32 låtar og eg har fleire idear som enno ikkje har kome ned på papiret.

– Kva skriv du om?

– Eg veit at livet kan vera både godt og vondt og eg synest det er viktig å få fram skyggesidene òg.

– Derfor vel eg å skriva om dette og håper nokon kan kjenna seg igjen i tekstane mine, seier den unge og talentfulle låtskrivaren Aurora Aksnes.

Her kan du høyra Aurora Aksnes si låt, Puppet (ekstern lenkje, NRK.no)

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.