– Dette lover bra for den travle haustsesongen

Måndag 5. juli var det tid for Askokarusellen i Arna idrettspark.

Dette var siste stemne før fellesferien.

Os Turn Friidrett stilte med desse åtte deltakarane:

• Nora Berge Steinsland J10
• Frida Berge Steinsland J13
• Synne Hjertaker J13
• Sondre Pedersen Matre G13
• Julie Dyrli J14
• Martin Hjertaker G16
• Thea Osvold Hausberg J17
• Malin Dale J19

Dei deltok i desse øvingane: 60 m, 100 m, kule og høgde.

– Med 20 gradar, sol og medvind låg det til rette for gode resultat.

– Dessverre blei det litt for mykje vind i periodar, så nokre av dei gode resultata blei ikkje godkjente, seier trenar Sindre Steinsland.

Søsknene Hjertaker i høgda

Søskene Hjertaker, Martin og Synne, viste fine takter i høgde.

Synne hoppa 1.30 og fikk 2. plass. Ho har hoppa 1.37 tidlegare i år.

Broren Martin er i fin form om dagen. Han hoppa 1.80 og reiv hårfint på 1.85.

– Matta var lita, og fokuset på å landa på denne matta stal kanskje litt for mykje av merksemda til utøvarane, då det var fare for å landa på kanten og skli av.

Kasta kule 2 cm frå UM-kravet

I kulesvingen på motsett side markerte Os seg sterkt. Der blei det ny personleg bestenotering på alle frå Os.

Thea Osvold Hausberg betra persen sin fra 10.17 m til 10.48 m.

– Ho er no berre 2 cm frå UM-kravet på 10.50. Det betyr at Thea har god sjanse tilå klara kravet over sommaren, seier Steinsland.

Malin Dale J19, som støyter med 4 kg kule, har også hatt fin framgang i kastøvingar i år.

– Ho persa med 8.45 meter.

Julie Dyrli J14 var første gong over 6 m i konkurranse då ho kasta 6,20.

Seinare i veka persa ho igjen med 6,37 m under eit lokalt stemne heime på Kuventræ torsdag.

Pedersen Matre med eit løp det lukta svidd av

Sondre Pedersen Matre viste storform på både 60 m og 100 m .

– Spesielt 100-meteren lukta det svidd av, seier trenaren.

Sondre persa på både 60 meter (8,36) og 100 meter (13,26), men dessverre i litt for mykje medvind, så tida ikkje går inn i statistikken.

2:40 ut i denne videoen ser du Sondre fossa frå konkurrentane på 100 meter:

To jamne 13-åringar

Både på 60 meter og 100 meter jenter 13 var det fin duell mellom treningsvenninnene Synne og Frida frå Os.

– På 60 m løpte begge under pers (Frida på 9.05, Synne på 9.16), men dessverre i 0,1 for mykje i vindstyrke. Begge viser fin framgang!

I same heat deltok også Victoria Madelen Bekken, som har beste tid på 60 m for J13 i Vestland i år. Ho kom i mål på 8.64.

På 100 meter var rekkefølga snudd mellom Synne og Frida. Då trekte Synne det lengste strået med 14.90 og Frida hadde 14.92.

– Det er kjekt når vi har to jamne i same klubb, som pushar kvarandre både i konkurransar og på trening.

Nora Berge Steinsland J10 var einaste rekrutt fra Os.

Ho løpte ein god 60 m, og fekk ny årsbeste med 10.60.

– No tar vi ein liten pause med konkurransar, og går inn i ein treningsperiode i fellesferien før det brakar laus med stemne i august igjen.

– Det blir tett program utover, då mange av dei store stemna som normalt blir arrangert på våren er flytta til over sommaren, fortel Sindre Steinsland.