Fekk 9.050 kroner i fartsbot

Laurdag kveld hadde politiet fartskontroll i 50-sona på Hegglandsdalsvegen.

Fire bilistar blei stoppa. Ein av dei blei meldt, utan at politiet i rapporten fortel kvifor.

Tre andre fekk forelegg for høg fart.

– Høgaste fart blei målt til 71 km/t, opplyser Bjørnafjorden lensmannskontor.

Det kvalifiserer til 9.050 kroner i forelegg og tre prikkar på førarkortet. Om farten var 1 km/t lågare ville det blitt eit forelegg på «berre» 5.850 kroner.

Politiet fortel om ei elles roleg helg.

I 00.30-tida både natt til laurdag og natt til søndag kom det klage på støy frå fest.

Natt til laurdag blei festen avslutta då politiet kom.

Natt til søndag skal det ha vore ein bråkete ungdomsgjeng på ei adresse, men det roa seg då patruljen kom.