Fleire osingar i poker-NM i Dublin

For ei veke sidan blei NM i poker arrangert. I Irland.

Private pokerlag er i ferd med å bli, lovleg med pengepremiar i Noreg. Neste NM ligg an til å bli arrangert i heimlandet.

– Det er heilt greit at det blir arrangert i utlandet, det blir nokre fine kompisturar ut av det, seier Bjørn Mjelva.

Sjølv var Mjelva NM-debutant, men fleire av venane han reiste med har vore med før.

– Vi reiste som læregutar, men enkelte gjorde det ganske bra. Uansett går stort sett vinninga opp i spinninga, men det er spennande og lærerikt. Vi reiser heim som betre pokerspelarar, seier han.

Osingar og kjendisar

Det skal vera fleire store pokermiljø i Os, minst fire grupper, fleire av dei tel rundt 30 pokerspelarar, menn og kvinner.

– Mange byrjar å bli veldig flinke. Vi var ein gjeng på rundt 15 som reiste, men vi møtte fleire osingar rundt borda på det fasjonable golfhotellet City West.

Kjendisar var det også rikeleg av. Aylar Lie, Tone Damli Aaberge og fotballspelarane John Carew og John Arne Riise.

TV2 sendte frå NM, der Tone Damli gjorde det skarpt i ei rein jenteturnering.

Over 1200 deltakarar

Det kostar 800 euro å delta. Kven som helst kan melda seg på.

– Vi kom på formiddagen opningsdagen onsdag og reiste heim før finalane starta søndag kveld.

Bjørn fortel at det blir delt ut åtte NM-titlar. Tre av desse gjekk til bergensarar, også førsteplassen i hovudspelet, som gjekk til ein som grunna studier bur i Bergen.

– Det er ulike spel. Eg var nøgd med ein 14. plass på eit spel med rundt 160 deltakarar, men i «Main Event» var det 1275 deltakarar. For å nå til topps må du spela godt i 13 timar per dag, inkludert pause, i fire dagar. Det krev sin mann eller si kvinne å nå opp der.

Etter det Midtsiden kjenner til skal det ha vore enkelte spelarar frå Os som var nær plass ved finalebordet på hovudspelet.

Livleg derby

Den fotballinteresserte trenaren frå Søfteland fekk seg også ein tur utanfor det store hotellet.

– Eg fekk høyra at Shamrock Rovers skulle spela lokaloppgjer og fekk ordna med ein tur på kamp torsdagen.

– Det var berre 5000 tilskodarar, men dei lagde minst like mykje liv som det var på Brann Stadion i 2007. Det var ei flott oppleving og eit fint avbrekk frå pokeren, synest han.

– Kva blir det neste? Las Vegas?

– Vegas trur eg blir for høgt tempo for oss. Men det er ei stor og god turnering i Barcelona, EPT, som hadde vore flott å få med seg, seier Bjørn Mjelva.