Førarkortbeslag etter kollisjon
To bilar kolliderte på Halhjemsvegen søndag kveld.
Søndag i 21.15-tida blei ein bil påkøyrd bakfrå på E39 Halhjemsvegen.
Uhellet skjedde nær Halhjem Kafé.
– Det var ingen personskade, men materielle skadar på begge bilane. Den eine var ikkje køyrbar etter samanstøyten, fortel politioverbetjent Christine Jansen Grindstein.
Politiet tok beslag i førarkortet til førar av den eine bilen, ein mann i 20-åra. Han samtykka ikkje til beslag.
I den andre bilen var ein kvinneleg førar med ein mann som passasjer.
Feststøy og promillekontroll
I 01-tida natt til søndag fekk politiet melding om støy frå fest på ei privat adresse utanfor Os sentrum.
– Patruljen var på staden og gav deltakarane pålegg om å dempa seg. Det retta dei seg etter.
Klokka 01.15 stoppa politiet ein bil på Lyseklostervegen. Bilførar fekk pålegg om å utbetra feil på baklys, og å ikkje køyra bilen før dette var reparert.
Søndag formiddag, frå 11.20 til 12.15, hadde politiet promillekontroll i Os sentrum.
22 bilistar blei kontrollert, og politiet fann ikkje noko å reagera på.
Førar av lett MC som søndag i 14.30-tida blei målt til 80 km/t i ei 50-sone, samtykka saman med foreldra til førarkortbeslag. Vedkomande blei stoppa på Lepsøyvegen.
– Vi har fått fleire meldingar om høg fart på denne strekninga den siste tida, seier Grindstein.
