Frå måndag 3. juli har du kunna stemma på «tidleg førehandsstemming».
Ordninga gjeld til 9. august, men sidan opningstidene i Bjørnafjorden har vore fire dagar i veka, med stengt onsdag, var siste sjanse før klokka 14 i går.
I dag blir det rigga stemmelokale i Vognhallen og på kommunetunet i Eikelandsosen.
Førehandsstemming frå i morgon
Begge opnar for ordinær førehandsstemming i morgon, torsdag 10. august, og held ope til og med fredag 8. september.
Valdagen er måndag 11. september.
Førehandsstemminga ved dei to vallokala i Bjørnafjorden kommune held ope frå måndag til fredag frå klokka 09 til 15.
Det blir også utvida opningstid begge stadar enkelte datoar:
Torsdag 31. august, onsdag 6. og torsdag 7. september har opningstid 09 til 17.
Laurdag 26. august og laurdag 2. september har opningstid 10-14.
Frå 15. til 24. august, éin dag per stad, er det sjanse for å stemma ute i krinsane og bygdene, for eksempel på Luranetunet, Ravneberghaugen, Kysthospitalet og Kongshaug Musikkgymnas.
Oversikta finn du på kommunen si side.
Legitimasjon og valkort
Hugs å ta med deg legitimasjon med bilde når du skal stemma!
Valkort er ikkje naudsynt, det er først og fremst ei stadfesting av at du har stemmerett.
Rekord i 2019
Ved førre kommunestyreval, det første for nye Bjørnafjorden kommune, var det 4.778 som hadde førehandsstemt.
3.775 av desse i Os, 639 i Fusa og 364 i andre kommunar eller i utlandet.
Det utgjorde 25,54 prosent av dei med stemmerett, noko som var ny rekord for begge dei tidlegare kommunane.
Tilsvarande tal frå 2015 er 17 prosent.
