Gjev frå seg 20 prosent av fjorden

Forsvaret var ein av dei som var representert på oppstartmøtet for E39 Aksdal-Bergen i Oseana måndag.

Les òg: Fekk innspel til Aksdal-Bergen

Statens vegvesen har tidlegare fortalt om god dialog med Forsvaret, som bruker Bjørnafjorden som øvingsområde, og partane er no einige om framtidig løysing når det kjem bru frå Reksteren til Os.

– Vi gjev frå oss 20 prosent av øvingsområdet, fortel kommandør Geir Skorstad i Sjøforsvaret.

Øver på innsida av brua

Det var ikkje ope for spørsmål frå pressen, men Midtsiden fekk ein prat med kommandøren etter møtet.

– Kvar ligg dei 20 prosenta av øvingsområdet i fjorden, som de vil gje frå dykk? Rundt landfeste på Reksteren og i Os?

– Nei. Vi gjev frå oss alt på utsida av brua og held fram med å øva på innsida, fortel Skorstad.

– Om brua får ilandføring på Halhjem i staden for i Øyane, så blir øvingsområdet mindre. Ønskjer Forsvaret ilandføring i Øyane?

– Vi øver på innsida uansett. Det er ikkje noko i vegen for ilandføring på Halhjem, men det kjem litt an på korleis brua blir ført over fjorden, kva linje den får.

Store verdiar står på spel

Skorstad fortel at Bjørnafjorden, med sin nærleik til Haakonsvern, sin djupne og form, er ein svært viktig øvingsplass for ulike typar militære farkostar og utstyr.

Nærmaste alternative øvingsområde, om Bjørnafjorden ikkje kan brukast, er i Nord-Noreg.

– Både eksistrande flåte og nybygg er utrusta med veldig avansert teknologi. Mykje av dette er norsk, spesialtutvilka utstyr. Dette skal testast, kalibrerast og vedlikehaldast.

– Om vi får ein leverandør på besøk, og skal ha installasjon eller test, og må reisa til Nord-Noreg kvar gong, blir det mykje pengar av det.

Medan E39 Aksdal-Bergen ligg an til å få ein prislapp på 20-30 milliardar er det også snakk om mykje pengar når det kjem til Forsvaret sin ressursbruk, og ikkje berre når det kjem til nybygg.

I tillegg til at det truleg skal brukast opptil 60 milliardar på nybygg fram mot 2030, skal Sjøforsvaret fram til byggestart på Aksdal-Bergen bruka nesten like mykje på drift av dagens flåte som det vegprosjektet kjem til å kosta.

– Fram til 2022 skal vi bruka 20 milliardar på utstyr og teknisk drift og vedlikehald av dagens flåte. Då er vi glad for at vi også i framtida kan bruka Bjørnafjorden som øvingsområde, seier kommandør Geir Skorstad.