Oppdatert: Hundane er funne

Oppdatert: Hundane er funne i fin form.

– Dei er varme, slitne og tørste, men har det elles bra, seier eigar, Espen Krüger Andersen.

Hundane blei funne mellom UnoX og Hetleflåten ein stad, i luftlinje rundt 6 kilometer frå der dei sist var sett av eigar.

Vedkomande varsla politiet, som igjen varsla Viking. Dei kontakta eigar.

– Eg er imponert over at dei fekk hundane inn i bilen. Dei er snille, men noko sky ovanfor framande.

– Og så er eg først og fremst letta og glad for å ha fått dei heim, seier Andersen i 12.50-tida, ti minutt etter heimkomst og kort tid etter at vi publiserte saka under:

Opprinneleg etterlysing:

Torsdag kveld la vi ut etterlysing etter to hundar.

Dei blei sist sett på bakkene på Tveit i Hegglandsdalen klokka 21.15 onsdag kveld.

Les ògDesse to har vore sakna i nesten eit døgn

– Dei er framleis ikkje funne, seier eigar, jeger og viltkontakt Espen Krüger Andersen.

– Både eg og mange andre har vore, og er, ute og leitar. Eg er veldig takknemleg for alle som har stilt opp!

Har du tips kan du kontakta eigar på 91154067.

Andersen var ute og trente hundane då dei tok av etter ein hjort. Han følgde dei eit stykke, også etter at dei mista teften på hjorten, men etter at dei kryssa Hegglandsdalsvegen vestover mot Møsnuken/Gjemdalskaret mista han kontakten.

– Det er to hannhundar. Den eine er ein erfaren ettersøkshund, den andre er kvalp. Ingen av dei har stukke av før.

– Kva trur du kan ha skjedd med dei?

– Eg trur dei er på oppdagingsferd, at kvalpen påverkar han eldste.

– Er du ikkje uroa for at noko gale har skjedd?

– Foreløpig er eg ikkje det. Det eg er mest redd for er at dei skal springa ut i ein trafikert veg og bli påkøyrd, seier mannen som ofte leitar etter påkøyrd hjort i Os.

– Kan dei ha sete seg fast?

– Dei har sele på, men ikkje band, så eg tviler på at ein av dei sit fast i noko. Han eldste har sete seg fast berre éin gong, og han ville ikkje ha gitt seg å bjeffa før han var funnen. Med så mange turgåarar som er ute i dette fine vêret, ville nokon høyrd han.

– Har du råd til folk som er på tur, og som samtidig ønskjer å hjelpa?

– Ja. Om du høyrer bjeffing, ikkje rop, for då vil dei truleg bli stille. Gå heller etter lyden så lengde du kan, sånn at dei blir best mogleg lokalisert.

– Og om du har ei jaktfløyte, så er innkallingssignalet deira to korte støyt. Om dei då kjem til deg, så vil dei nok snu og løpa vekk når dei ser at det er framande som bles i fløyta. Men då har vi i det minste ein observasjon.

Har du tips kan du kontakta eigar på 91154067.