Klare for Øyafest

I november blei det kjent at Osbygda får ein ny festival. Øyafest blir spelt på Sundøy Arena fredag 5. august.

I desember kom første band, Vestlandsfanden, på plakaten. I kveld slepp dei neste.

– Me er veldig glade for å få Gunslingers til Øyafest! seier styreleiar i den nye festivalen, Tommy Aasen.

– Dei sto høgt på ønskjelista. Det er mange i Øyane og resten av Os som liker dette fine hardangerbandet og musikken deira, og dei var heldigvis ledige.

Gunslingers kjem rett frå countryfestivalen i Seljord til Øyane første fredagen i august.

Tilbake til nabokommunen

Gunslingers er eit norsk pop-country-band med rot i Tørvikbygd i Hardanger, drygt 30 kilometer frå kommunegrensa mellom Kvam og Bjørnafjorden.

Låtane, med titlar som «Hiakktreff på Osterøy» og «Viagra, Biff og Bernaisesaus», går på Hardanger-dialekt med ein god dose humor.

Dei har spelt på Os før, to år på rad då Osfest-arrangørane hadde romjulskonsertar i Nore Neset Aktivitetshus.

Då var cowboyhatt-faktoren høg.

– Du må ikkje ha hatt på deg, berre du har med deg godt humør. Men du kan jo bli i godt humør av å ha på deg hatt, seier låtskrivar og frontfigur Frode Måkestad.

Det har vore noko utskifting sidan starten i 2008.

Gunslingers består i dag av: Frode Måkestad (vokal og kassegitar), Jan Ove Johansen (el-gitar og vokal), Dag Wolf (pedal steelgitar), Nikolai Storevik (fiolin), Tore Mæhle (bass) og Frode Andreassen (trommer).

Frå ferjekonsert til fjøresteinane

Måkestad gler seg til ein vår og sommar som går mot det normale etter to år med pandemi.

– Me har halde hjula i gang, så langt det let seg gjera. Det beste me gjorde under pandemien var nok «boat-in-konsert» frå ferja. Det var vellykka, med 2x600 selte billettar, det einaste overskotsprosjektet desse to sesongane.

Måkestad har også fått skrive litt under pandemien, men ikkje noko som har blitt spelt inn.

Dei har likevel med seg rimeleg fersk musikk til fotballbanen nær fjøresteinane på Sundøy.

Førre album, «Bukkejakt», kom i 2020, nokre veker før landet gjekk i første koronapause.

– Kan vi rekna med scenepyro?

– Ja, det skal nok smella i Øyane òg, seier Frode Måkestad.