Kom med trugslar då han blei nekta inngang

Laurdag i 23-tida blei politiet kontakta av ein restaurantdrivar i Os sentrum.

– Ein mann som blei nekta å koma inn skal ha kome med trugslar mot ein av dei tilsette, fortel politioverbetjent Anne Lyssand.

– Restaurantleiinga vurderer å melda vedkomande, som er ein mann i 60-åra.

Etter det Midtsiden kjenner til er dette same mann som tidlegare i sommar blei meldt og bøtelagt for å ha spytta og slått ein kvinneleg tilsett på ein restaurant i sentrum.

Vakna av at tre ungdomar var i huset

Søndag blei det ettermeldt ein episode frå 02.50-tida natt til søndag.

– Ei kvinne som bur i eit nabolag på Skeie vakna av at det var folk i huset. I gangen sto tre ungdomar.

Kvinna jaga ungdomane ut, utan å veta kva dei ville der.

– Det er uvisst om dei planla å stela noko eller om det var fulle folk på veg heim frå fest, som hadde gått feil, seier Lyssand.

Fann lommebok

I helga har politiet blitt varsla om funn av lommebok.

– Ein mann fann lommeboka i Banktjørnhaugen, midt i vegen, nær Amfisenteret.

– Det skal ha vore ein del kontantar i lommeboka, og vi takkar for at han er ærleg og melder ifrå. Peronalia låg i lommaboka, og eigar kjem her på lensmannskontoret og hentar den i dag.