Kulturskulen held show, utstilling og auksjon

I dag er det «vårframsyning» - show med song, musikk og dans av Bjørnafjorden kulturskule i Oseana.

Dette er første store framsyning sidan juni i fjor.

Les òg– Med danseglede kjem det håp

– Rundt 120 elevar deltar, fortel rektor Christian Breistein.

– I tillegg har 23 elevar frå klassane med visuelle kunsfag laga ei utstilling.

Utstillinga er montert i foajeen, og blir hengande der til 18. april.

Eitt av verka er eit fellesarbeid som har gått frå elev til elev, og som skal auksjonerast vekk.

– Salssummen blir donert til Redd Barna for å støtta deira arbeid i Ukraina, fortel lærar Inga Søreide, lærar i visuelle kunstfag.

– Interesserte kan koma med bod direkte til meg, anten i kveld eller seinare, fram til 18. april. Høgaste bod blir publisert og oppdatert på kulturskulen si side på Facebook.

Bildeserie:

1 av 2

Nytt fag får vist seg fram

I Oseanasalen får publikum sjå elevane spela ei rekkje instrument, synga og dansa.

I skrivande stund er rundt 3/4 av dei 500 billettane selte.

Les òg– Musikk er også teknologi

– Også elevane frå faget «musikkteknologi» deltar. Faget var nytt i fjor, så dette er deira debut på kulturskule-framsyning, seier Breistein.

Skulen har rundt 490 elevar. Nokre av dei deltar i fleire fag eller instrument, og i alt 630 elevplassar er i bruk.

– Vi fekk ein liten nedgang det første pandemiåret, skuleåret 2020-2021, men er no tilbake på same høge deltaking som før.

I april blir grunnlaget for neste skuleår danna, søknadsfristen er 1. mai.