«Kva skjer her?»
Køen gjekk nesten ut på brygga.
Klokka nærmar seg 13.
Køen strekk seg langt - ei melding til Midtsiden-redaksjonen tikkar inn.
– «Kva skjer her?»
Vi rykkjer ut. Ikkje til agurknytt, men noko som liknar.
Ekte potetnytt
Det er nemleg potetbilen som har stilt seg opp på Esso, og lokka til seg store folkemengde, blant andre Paul Olsen.
– Det gjeld å ikkje stilla seg sist i køen. Det har eg gjort éin gong, og då var det utseld før eg kom fram, fortel Olsen.
Det er ikkje noko fast tidspunkt kor tid potetbilen kjem, men interessa er stor. Når potetbilen sender melding om at dei kjem, er det ikkje få som kastar seg rundt.
Olsen og ein av dei andre er ikkje sikker på kor potetene kjem frå, men dei er begge einige om at det er på «hi sio av fjord'n».
Kva for ein fjord er dei usamde om, men det er ikkje så farleg.
– Det er gode prisar og solid kvalitet, fortel dei.
Etter litt undersøking kjem det fram til at Potetbilen kjem frå Nærbø, litt sør for Bryne. Nokre fjordar unna, med andre ord.
Potetbilen har rekkevidde over eit stort område, og køyrer både nord, sør og aust i landet.
Produkta dei sel er blant anna potet, gulrot, egg og andre rotgrønnsaker, og responsen i Os ser ut til å vera tilfredsstillande.
