Markerte 90-årsdagen med fire generasjonar - og eit museum av ei utstilling

Laurdag markerte Dag Andersen med kollegaer, familie, kundar og andre gjestar at Er-An Bilverksted er 90 år.

Bestefar Erling Andersen (senior) starta verkstaden i 1932.

Dette er same år som Donald Duck blei skapt, NRK blei statsbedrift og Norheimsund sentrum brann ned.

Så dreiv Dag sin far Jahn den til midten på 1980-talet, då han blei sjuk, og nyutdanna Dag tok over leiinga. Verkstaden og bensinstasjonen blei skilt i to firma i starten på 1990-talet.

Les ògFeirar 90 år med verkstad

Rundt 200 besøkte verkstaden i løpet av den fire timar lange dagen med open verkstad.

– Vi fekk delt ut 160 kakestykke og allereie første timen gav vi ut 90 lodd. Det var trekning kvar time, i tillegg til ein noko krevjande quiz, der deltakarane blant anna måtte fortelja kva utstilt, gamalt verktøy tidlegare blei brukt til, fortel innehavar Dag Andersen.

Ingen klarte alle 13, men fem deltakarar hadde 12 rette.

Bildeserie:

1 av 3

Det var ikkje berre quizen som bydde på blikk tilbake i tid.

– Eg liker å ta vare på gamle ting, og det kom godt med på ein dag som denne.

I utstillinga sto blant anna ein A Ford 1929 modell, altså same år som bestefar og grunnleggar Erling Andersen fekk fagbrev, ein Chevrolet frå 1949 som liknar den bestefaren hadde, ein Volvo Ekspress frå 1972, som far Jan hadde til å køyra ut parafin til kundane i.

Bilverkstaden var også forhandlar av motorsyklar frå Jawa og Tempo. Både Dag sine eigne Jawa-ar og fetter Tore Henrik Drange sin Tempo var stilt ut.

Bildeserie:

1 av 8

– R-12121 var far sin. Han kjøpte den av ein kar frå Strandvik, som hadde kjøpt den ny på 1950-talet.

– Då eg overtok den gamle sykkelen, sa eg til første eigar at eg skulle koma til Strandvik å visa den når eg var ferdig med restaureringa. 20-30 år seinare, i fjor sommar, var eg endeleg ferdig, seier Dag og ler.

Besøket hos første eigar, som no er i 80-åra, blei ei flott oppleving.

– Han saumfarte sykkelen, mimra over ulike delar av den, og var glad for å sjå den i god stand igjen.

Bildeserie:

1 av 3

Sjølv hadde Dag kledd seg likt som bestefaren under markeringa, mens kollega og fetter Kim Ove Linde var kledd som neste generasjon, Jan Andersen, og yngste kollega Joakim Titlestad gjekk i dagens antrekk.

– Skjorte og slips under kjeledressen?

– Det var vanleg på den tida. Det var ikkje kven som helst som eigde bilar på 1930-talet, og heller ikkje kven som helst som kunne reparera dei, forklarer Dag om statusen på yrket då bilar var eit nyare fenomen som transportmiddel.

Bildeserie:

1 av 3

På kvelden kom fleire gamle, trufaste kundar, og nokre tidlegare tilsette, på middag på Er-An Veikro.

– Vi blei rundt 50 deltakarar, og det blei ei heilt fantastisk stund med historieforteling og mimring frå tidlegare epokar på Er-An. Ein av gjestane, Henny Haugetun, er like gamal som stasjonen.

– Eg hugsar sjølv då eg var gutunge og fylte bensin for ho. Henny bestilte for den tida for 30 kroner på bobla si, minnast Dag.