Markus med tre NM-medaljar

I helga blei NM i vassjet arrangert på Fagernes, og Markus Slettebakken kom heim til Os med tre bronsemedaljar.

– Ronny Mangerud og Stian Schjetlein er ikkje så mykje å gjera med, det tar nokre år før eg kan ha håp om å klatra forbi dei, seier Slettebakken.

Ronny og Stian tok 1. og 2. plassen i første EM-runde no på forsommaren. Markus hamna på 5. plass.

Betre enn i fjor

I fjor blei det 4. plass i lite-klassen og 3. plass i sprint på Markus i NM. No er han nøgd med bronse i både lite-klassen, grand prix og i Jansensprinten.

– Jansensprinten?

– Ja, det er ein sprintklasse som blei innført etter at bestefaren til Stian gjekk bort. Han heitte Jansen og var ein ivrig fan, stilte alltid opp og heia på alle, ikkje berre Stian.

Jansen var også i diskusjon med andre, blant anna Markus sin far Tor, om ein kortare distanse ville vore publikumsvenleg. Åtte rundar per heat kan vera mykje å følgja med på, spesielt når dei raskaste byrjar å ta igjen dei bakerste med ein runde eller to.

– Han fekk den nye sprintklassen oppkalla etter seg. Noreg er einaste land som har sprintklasse, fortel Markus.

Men andre land skal ha fått augo opp for denne sprintklassen. Vanlege klassar blir kjørt i tre heat med åtte rundar i kvart heat. Sprintklassen har éin runde utanom startrunden.

I open klasse for første gong

I lite-klassen kan du ha inntil 80 hestekrefter i vassjeten din. Markus har nettopp 80 hk i sin Kawazaki SX-R 800.

– Men i GP (grand prix) er det heilt ope, der kan du stilla med kor mange hestekrefter du vil. Eg fekk låna ein lik vassjet som min, men trimma til 140 hk, fortel Markus.

Dermed deltok han i GP for første gong, også der hamna han rett bak dei to beste i Europa.

– Det var enorm aksellerasjon ut av svingane med trimma vassjet. Det var gøy, men det var tungt å kjøra den når du ikkje har prøvd det før. Eg kunne sikkert kjørt like fort med min eigen.

Portugal neste

I neste EM-runde, som går i Portugal i slutten av juli, håper Markus på endå betre plassering enn sist.

– I første runde kjørte eg på lånt vassjet. Då fekk eg ein frå Sverige og ein frå Belgia inn bakk Ronny og STian, men før meg.

– No kan det henda at det blir plass til min jet på ein hengar som andre skal ha med seg nedover, og viss eg får kjøra på min eigen så trur eg at eg har sjanse til å koma meg inn rett bak Ronny og Stian også i EM-runden, seier Markus Slettebakken.