Nytt og lengre stupebrett på plass i Mobergsvikjo

I dag føremiddag kom det nye stupebrettet på plass i Mobergsvikjo.

Det gamle stuebrettet var 5,5 meter langt, det nye er 6 meter.

– Årsaka er at det skal bli litt tryggare med tanke på djupna under den ytste meteren av brettet, seier driftsleiar i Bergen og Omland Friluftsråd, Bjørn Nilssen.

Helga i midten av april fekk 18 varmegradar. Då blei det bading frå bryggene nærmast Mobergsvikjo.

No er det meldt opphaldsvêr og sol ut veka, gjennom helga og utover i neste veke - men høgaste temperatur er 12 gradar, som er meldt til fredag.

Fleire fornyingar

Frå tidlegare har det kome på plass nye stigar ved sida av stupebrettet, og det kjem kanskje eit nytt alternativ til badebrygga som blei fjerna i fjor.

– Vi har sett på ei løysing som er både tryggare og kanskje noko kjekkare enn den vi hadde, men foreløpig kan eg verken fortelja noko meir eller lova noko, seier Lisbeth Axelsen i Bjørnafjorden kommune.