Dei siste fire åra har oter vore observert fleire plassar i Os.
Arten har vore fotografert og filma på jakt etter laks i Oselvo, med ein heil familie i Øyane og med ein ultraløpar i hælane på Svegatjørn tre månadar før opning av ny E39.
I går blei ein oter påkøyrd på Ulvenvegen, ved Os Jakt og Fiskelag sitt klubbhus «Ulvehiet» på Ulvensletta.
– Vi kom i bilen bak. Det var to fortvilte damer i bilen som køyrde på oteren, og dei skal først ha trudd at dei hadde køyrd på ein katt, fortel eit vitne til Midtsiden i 22.20-tida onsdag kveld.
![– Eg måtte pirka i den før eg løfta den, i tilfelle den berre var svimeslått. (Foto: Kjetil Vasby Bruarøy)](/_next/image?url=https%3A%2F%2Fcdn.sanity.io%2Fimages%2Fahcmq7tx%2Fproduction%2Fe42f5803269ea030632a69f7e4102cd33f702428-1800x1200.jpg%3Frect%3D0%2C60%2C1800%2C1080%26w%3D752%26h%3D451%26q%3D100%26dpr%3D2&w=3840&q=75)
Han fekk låna hanskar av ein bussjåfør som også stoppa på staden.
– Oteren såg nesten uskadd ut, så eg pirka litt i den for å sjå at den var livlaus før eg løfta den og fekk den ut i grøfta.
Det skal ha vore forsøk på å ringa politiet eller viltkontakt i går, utan at innringar kom gjennom.
– Bestanden byrja å ta seg opp for 10-12 år sidan. Oteren kom nok frå Sogn og nedover, og no er den observert også i Hardanger og sør til Bømlo, sa Terje Haugland, oppsynsmann i Statens Naturoppsyn (SNO) i Hordaland til Midtsiden då det for sju år sidan blei funne ein død oter på Osveien ved Kalandsvannet.