Oter i Oselvo 2019

Tjuvfiskar fanga på kamera

Nye kamera i Oselvo avslører oter på jakt.

Av: Kjetil Vasby Bruarøy

Natt til fredag blei ein oter observert på undervannskamera som blei installert i Oselvo i april.

– Det skjedde også natt til måndag, men denne gong fekk vi endå betre bilde, i tillegg fekk vi sjå at han missa på ein fisk, fortel Anders Lamberg frå Skandinavisk Naturovervåking.

Kamera overvaker kontinuerleg, men er installert sånn at det blir lasta opp «høgdepunkt» med korte videosnuttar når det er rørsle. Desse videoane er tilgjengelege for alle på nettsida kart.skynordic.no.

I videoen over ser du to korte klipp, først frå 6. mai (kl 02.48), så frå 10. mai (kl 00.11).

OPPDATERT: Også klokka 23.54 fredag kveld var det oter på TV i Oselvo (du finn klippet på skynordic)

Ser stadig meir oter

– Vi har kameraovervaking i mange elver, og har sett oter i alle vassdraga vi overvaker i Hardanger. Bestanden har tatt seg opp igjen dei siste åra.

• Les òg: Oterfamilie har etablert seg i Øyane (2018)

– Oteren er ein god jeger, men tar helst den mindre fisken, med mindre han får jakta i ei laksetrapp. 

– Den et berre delar av fisken, mens ørn ofte et resten. Det har kome nokre teoriar den siste tida som handlar om at ørnebestanden aukar og spreier seg i takt med oterbestanden.

• Les òg: Sel eller oter i Os hamn (2017)

Del av viktig dokumentasjonsprosjekt 

Selskapet har installert fire kamera i Oselvo, i sone 1 og 2 (nord for Unik), som kom i drift 11. april i år, og som er del av prosjektet Salmon Tracking 2020.

Målet er at dei skal vera med å dokumentera fleire fohold, ikkje minst kor tid smolten går ut av elva. 

• Les òg: Villaksen har stempla inn i fjorden (frå same prosjekt) 

Dette er viktig for oppdrettsbransjen, som finansierer prosjektet, og som vil ha best mogleg timing på si avlusing av oppdrettsfisk.

– Kameraovervaking i Oselvo har vore diskutert for nokre år sidan, men då blei sikt eit diskusjonstema. No startar vi med fire kamera i eitt år, så får vi sjå. Vi dekker heile tverrsnittet, og har blant anna sett at det allereie har vandra ut smolt.

(Frå før er det undervasskamera nedst i elva, under Osbrua. Bilde herfrå finn du på osgjestehamn.no.)

Er oter ein trugsel mot fiskebestanden?

Oter er raudlista, men kan bestanden auka så mykje at den blir ein trugsel for Oselvo-laksen?

– Eg er ingen ekspert på oter, og skal ikkje ta del i nokon debatt. Men eg ser at oteren har skapt debatt i nokre vassdrag. Det har òg blitt gjeve fellingsløyve for å halda oterbestanden på eit visst nivå.

– Men eg har ikkje observert at nokon ønskjer den heilt vekk, den er ein naturleg del av økosystemet i eit vassdrag. 

• Midtsiden samleside: Jakt og fiske

Fleire saker