Sjekk den benken!

Bildeserie:

1 av 3

Bergen har «Den blå steinen», Os har fått Den blå benken:

Onsdag overtok Os kommune nybygget på Kuentræ. Dobbelhallen er integrert i Osbadet og Oshallen, og torsdag opna ny hovudinngang.

• Bildeserie: På innsida av den nye dobbelhallen

Rett innanfor døra står ein lang og blå benk. Den har dei ikkje funne i ein møbelkatalog.

– Eg hadde eit ønskje om fleire sitjeplassar, og ein idé om korleis denne kunne sjå ut. Resultatet synest eg blei heilt supert! seier dagleg leiar Torbjørg Brattabø.

Skuleklassar og bortelag

Osbadet deler entré med Oshallen, Actic og ny dobbelhall.

– Vi har sett behov for fleire sitjeplassar utanom kafeen, og gjerne med plass til store grupper. Det kan vera skuleklassar som ventar på buss etter svømmeundervising i badet, eller bortelag som har spelt handballkamp.

– Denne benken er 11 meter lang, har to trinn, og står ved døra, som er ein fin samlingsplass.

– Vi har fått ein ny og stor foajé, med ein ganske lang gang ut til døra. Dette synest eg dessutan er fin utnytting og dekorering av dette arealet.

Innbyr til leik

Torbjørg lagde ei skisse, og gav det vidare til Walløe & Nilsens, som står for bygginga av ny resepsjon til Osbadet.

– Ein av dei tilsette, Sindre Tellevik, teikna denne ferdig og fekk den bygd.

Tanken var at benken ikkje skulle vera robust, at den toler at ungar klatrar og leiker litt, og at den ikkje skulle vera heilt A4.

No står den der, blå og delvis bølgjeforma, og ungane tok poenget.

– Den har allereie vore mykje i bruk, både til å sitja på, men eg ser òg at mange unge klatrar og leikar litt mens dei ventar. Vi er veldig nøgd både med form og funksjon.

– No gjenstår det berre å sjå om vi bør ha noko enkel, stilrein dekor på veggen bak - kanskje det kan bli ein fin plass å ta lagbilde for dei som besøker oss.