Sp kjempar for polititenester nær folk – heile året

Pressemelding:

Regjeringa har lagt ned 126 lensmannskontor og sentralisert vekk over 60 passkontor. I førre veke kom plasteret på såret: To passbussar. Ein for Sør-Noreg og ein for Nord-Noreg.

– Bur du i distrikta eller ein av byane som ikkje lenger har passkontor, er det mange som ikkje vil ha tid eller høve til å stille opp når passbussen berre skal kome ein gong i jubelåret, seier Jenny Klinge, justispolitisk talsperson for Senterpartiet.

– Vi i Senterpartiet går til val med slagordet «Nær Folk», og vi snakkar varmt om tenester nær folk i heile landet. Det regjeringa gjer, er stadig å sørge for det motsette.

– Heile passreforma er ei avstandsreform, på same måte som nærpolitireforma, kommunereforma, regionreforma og domstolsreforma. Regjeringa gjer, ved alle slike sentraliseringsreformer, blaffen i at ulempa og kostnaden ved større avstandar må takast av innbyggjarane og næringslivet, seier Klinge.

Stortingskandidat for Senterpartiet i Hordaland, Hans Inge Myrvold, meiner dette er nok eit eksempel på konsekvensane av regjeringa sin sentraliseringspolitikk.

– Sunnhordland har verkeleg sett kva regjeringa sin sentraliseringspolitikk betyr. Både nærpolitireforma, regionreforma og domstolsreforma har gått knallhardt ut over vår region. Tidlegare var det passkontor i Kvinnherad, Kvam, Fusa og Austevoll, no skal desse stadane få ein kassebil med passautomat på deling – saman med resten av Sør-Noreg.

– Dette er eit eksempel på skilnaden mellom Høgre og Senterpartiet. Vi vil ha tenester nær folk – når det høver for folk. Regjeringa, med Høgre i spissen, gjer fullstendig blaffen i lokalbefolkninga sine ynskje og behov.

– Dette gjorde dei då Hardanger- og Sunnhordland tingrett ville, som dei einaste tingrettane i landet, slå seg saman. Regjeringa, frå kontor i hovudstaden, bestemte at dei skulle fordelast som avdelingskontor til Bergen og Haugesund istaden. Dersom Høgre får halde fram, er det vel ikkje lenge til vi får tingrett i bubil også, seier Myrvold.

Senterpartiet går til val på å opprette lensmannskontor og politipostar gjennom ein fireåring «Opptrappingsplan for meir tilstadeverande nærpoliti».

Planen skal setjast i verk frå 2022. Då vil sjølvsagt også fleire passkontor opne for å få tenester nær folk – heile året.