Starta litauisk skule - får kjendisbesøk frå heimlandet

Nerija Cymermoniene starta ein litauisk skule i Os for tre år sidan. I tre timar kvar laurdag underviser ho ungar frå Bjørnafjorden og Bergen, med litauisk bakgrunn, i språk og historie.

Ho har fått låna klasserom på Borgafjellet barneskule til undervisinga.

– Det er både for å ta vare på kulturarva vår, og reint praktisk, om nokon av dei for eksempel vil til Litauen for å ta utdanning eller jobba på eit seinare tidspunkt.

– Skulen her på Os er godkjent i Litauen, fortel Nerija.

Ho starta med 8 elevar og er no oppe i 22. Dei fleste er i barneskulealder, men den yngste er 4 år og den eldste 18.

Nerija har med seg to andre frivillige, Julita Adomauskiene og Daiva Kripaityte, som assistentar på skulen.

– Kvart semester har vi avsluttingfest. Då er foreldre og søsken med. Vi har utdeling av diplom og spiser litt mat. I år blir det noko ekstra.

Kjent musikar frå Litauen dukkar opp

Førstkomande laurdag er det avsluttingsfest for vårsemesteret. Då blir det ikkje berre utdeling av diplom.

– Då kjem Jonas Chockevičius for å spela for ungane og foreldra.

– Jonas er ein komponist og musikar som har jobba på den litauiske musikkscenen i over 20 år. Han har vore medlem i det patriotiske heavy metal-bandet «Thundertale», og skrive fleire av songane til bandet.

Jonas har også deltatt i fleire TV-prosjekt og spelt på festivalar og konsertar.
I nyare tid har han også spelt ein del folkemusikk.

I videoen under er han på TV med bandet Thundertale. Jonas er vokalisten med lyst hår og kvit gitar.

– Andre barnefamiliar, som foreløpig ikkje har elevar på skulen, er velkomne til å delta på festen laurdag! Då får dei samtidig møtt oss på skulen og dei andre familiane.

– Korleis fekk du Jonas til å koma?

– Vi gjekk på skule saman, og eg spurde om han ville besøka Noreg. Han kom før 17. mai, og bur heime hos oss.

Jobbar også som lærar måndag til fredag

Nerija flytta til Noreg i 2013. Året før reiste ektemannen Tomas, for å testa ut arbeidslivet i Os i ein månad.

Ein månad blei til eit år, så kom Nerija og paret sine tre born - ein søskenflokk som no har auka til fire.

– Vi liker oss godt i Noreg og i Os. Det tok tid før eg fekk lært meg norsk og kome i jobb, men eg har gått gradvis frå vikar og deltidsjobb til denne våre, etter ni år, å endeleg få fast 100 prosent stilling.

Nerija var utdanna lærar før ho kom til Noreg. No jobbar ho på Kuventræ barneskule.

– Men vi saknar også heimlandet av og til, og eg er glad for å kunna bidra til at ungane våre, og andre familiar, lærer seg skriftspråket og litt om bakgrunnen vår.

Drifta av skulen er på frivillig basis.

– Vi får låna Borgafjellet barneskule gratis av kommunen, det er vi veldig glade for. Og så får vi nokre kroner i støtte til læremateriell. Arbeidet er basert på frivillig innsats, fortel Nerija.