Stor dugnadsinnsats på Lepsøy og Strøno
På Lepsøy gjorde tre tenåringar reint bord i fjørene, på Strøno blei det rydda både over og under vasskorpa.
Bildeserie:
I helga var det ryddedugnad i skjergarden i Os. Enkelte blei skuffa over det dei fann, andre blei glade.
• Les òg: Fylte båten med «profesjonelt» avfall og Fann tre flaskepostar!
Mange heldt seg heime i regnvêret, men dei som rydda gjorde ein enorm innsats.
Tre tenåringar tok «problem-fjøre»
Før Os kommune annonserte dugnaden var det ein hytteeigar som tipsa om store mengder plast og anna avfall i fjørene på Nordreneset på Lepsøy.
Tre lokale ungdomar stilte laurdag opp med båt og arbeidslyst.
Sjur N. Skorpen Lepsøy (16), Magnus Borgen (15) og Jon Oskar Døsen (15) plukka full båt med avfall frå Nordrevågen.
– Vi plukka til vi var tomme for posar. Båten blei stappfull, så det var så vidt at vi fekk plass til oss sjølv, fortel Sjur.
Gutane heldt på frå klokka 11 til 14.
– Det var veldig mykje tau og garnrestar i tanga. Vi fann òg ei lita flytebrygge som vi dessverre ikkje fekk gjort noko med.
Rydda under vatn og bak naust
I Strøno stilte ein gjeng på fem for å rydda ved den kommunale kaien i Nordstrøno.
– I tillegg hadde vi ein fridykkar, og han fekk opp seks spøkelsesteiner og tre syklar, fortel Tom Leganger-Hansen.
Laurdagen rydda dei bak alle nausta, i fjøresteinane og under vatn, søndagen gjekk turen til Ervikane.
– Her samla vi to sekkar med plast og tauverk. Vi var langt frå dei einaste på Strøno som hadde rydda, då vi gav oss var konteinaren i Ervikane godt fylt opp, så vi har inntrykk av at mange har vore på dugnad i Strøno gjennom helga.