Suksess med ny vri

I mars i år fortalte Os Sentrumsforening omny vri på årets marknadsdagar, nye utstillarar på veg frå Europa og flytting til ny dato, helga etter Osøren Blues & Jazzfestival, i staden for same helga.

– Havfest og Oseana fortener både full merksemd og ledig parkering, så det er flott at dei opnar åleine. Blues- og jazzfestivalen sørgjer for at ein del folk stikk heim i 17-tida for å førebu seg på konsert, og derfor går frå marknaden to timar før den stenger torsdag og fredag, forklarte Renate Iversen om datoskiftet.

Les òg:
Satsar på det søte
Delikate dagar

Sakna musikken - som likevel er vekke

Iversen, som etter marknadsdagane på Os tredde av som leiar for Os Sentrumsforening, fortel etter marknadsdagane, som var førre helg, at den nye vrien blei ein suksess.

– Sjølvsagt var det ein del som sakna streetparade med ungar i mars frå Fjellheim saman med jazzmusikarar, og bluesmusikk på scenen i sentrum på dagtid.

– Men dei siste åra har det vore mindre av slike ting likevel, i fjor var det ingen parade og i år gjekk jo festivalen heilt ut av indre sentrumskjerne. Det var nok like greit at vi hadde kvar vår helg, trur ho.

– Og så blei det blei jo tre helger på rad med fest i Os, frå Oseana-opning og festival til marknad med eksotisk innslag.

Vil tilbake

Det kom ikkje 50 utstillarar, som først annonsert, men dei cirka 20 europeiske utstillarane gjorde sitt til at marknadsdagane blei ekstra smakrike.

Regne hølja ned då dei rigga seg til om onsdagen, dagen før resten av marknadsdagane starta. Heldigvis blei vêret betre og betre nærmare helga.

Publikum skal ha kome med fine tilbakemeldingar på at ost, oliven, paella og pølse frå Nederland, Hellas, Spania og Italia, var eit fint tilskot til marknadsdagane.

Utstillarane skal også ha vore nøgd, og sjansane er visst store for at dei kjem tilbake neste år.

Rekordomsetnad

Trass i godt sal hos eksterne utstillarar var omsetnaden god også hos dei etablerte butikkane i Os.

– Dette er nok dei beste marknadsdagane vi har hatt, seier Paul Hans Sælen hos Jernia Sælen.

Tove Tvedt Skarstein hos S. Tvedt og Rune Walle hos G-Sport er einig. Fleire andre vi har snakka med, blant anna Anne Berit Moberg hos T. Moberg Sko fortel også om godt sal.

Os Sentrumsforening kjem truleg til å velja helga etter Osøren Blues & Jazzfestival som tidspunkt for marknadsdagane også neste år.