Tid for storfangst: Sjekk topp 5 i Oselvo

Med sol og varme i lang tid heilt inn til sesongopning, vart det ein beskjeden start på årets fiskesesong.

Men så kom «godvêret» med mykje nedbør og det vart fart på laksen.

Fram til no har det blit tatt nokre flotte eksemplar, Johnny Lund ligg på topp over topp 10-lista i henhald til kilofangst.

– Eg fekk ein på 13,9 kilo. Den er foreløpig på toppen av lista, men kjem det eit nytt renn med like mykje stor fisk, så er det slett ikkje sikkert at dette blir sesongens største, seier Lund.

Johnny har tatt stor laks i Oselvo før, som i 2014:

Les ògJohnny tok eit beist i Oselvo

Ein heftig kamp

Johnny Lund var eigentleg på veg heim frå fiske då han fekk auge på laksen. Då tok han å skifta ut makken med ein spinner.

Laksen beit på, men det blei ein solid kamp om å landa laksen under krevjande forhold.

– Det blei ein heftig kamp! Elvo hadde blitt så lita at eg måtte stadig sjonglera laksen mellom alle steinane som stakk opp av elva. Fisken ville sitt, eg ville mitt, seier Lund.

– På eit tidspunkt så fôr laksen inn mot Vallaelvo i staden for å gå ned mot Hammaren. Då måtte eg krypa under ei bru.

Det tok cirka 20 minutt før laksen var på land.

Topp 5

Det er allereie god kamp om plassane på topplista under årets sesong.

Her er dei fem tyngste til no:

1. plass - Johnny Lund, 13,9 kg

2. plass - Jon Grindevoll, 12,2 kg

2. plass - Stig-Gram Knutsen, 12,2 kg

3. plass - Bjørn Eitrheim, 9,2 kg

4. plass - Willy Håland, 9 kg

5. plass - Kenneth Sagebakken, 8,2 kg

Du kan sjå topp 10-lista, og fangst frå dag til dag, på heimesida til Ole Vidar Søviknes, ProHD.